Атырау облысы аудандарында кәсіпкерлік саласы қарқынды дамуда
Atr.kz/4 желтоқсан, 2019 жыл. Биылғы жылы Мақат ауданында 4 мемлекеттік бағдарлама бойынша 38 кәсіпкердің жобасы мақұлданды, деп хабарлайды Атырау облысының Өңірлік коммуникациялар қызметі.
Бұл туралы ӨКҚ-де өткен брифингте Мақат ауданының әкімі Шәкір Кейкин мәлімдеді. Бүгінге дейін Мақат ауданында 1400-ге жуық шағын бизнес субьектілері тіркелген. Шәкір Кейкиннің айтуынша, бұл көрсеткіш ауданда бизнес нысандарының көбейіп, кәсіпкерлік саласының қарқынды дамып келе жатқандығының нәтижесі.
— Ағымдағы жылдың қаңтар-қазан айында аудан бойынша 7 шағын бизнес нысаны ашылды. Яғни, Мақат пен Доссор кенттерінен кафе, шайхана мен дүкендер, автотұрақ және техникалық қызмет көрсету кешені іске қосылды, — дейді аудан әкімі Шәкір Кейкин.
Айта кетейік, биылғы жылы Мақат ауданында жалпы саны 63 млрд. 73 млн теңгенің өнімі өндірілді. Бұл көрсеткіш былтырғы жылдың сәйкесті мерзімімен салыстырғанда 312,8 пайызға өскен.
