Атырауда 59 адам алимент төлеуден жалтарып жүр

Атырауда 59 адам алимент төлеуден жалтарып жүр. Сондай-ақ, 314 борышкер іздестірілуде.

Бүгінде жүргізілген іс-шаралардың нәтижесінде төлемнен жалтарған 40 адамның және 200-ден астам борышкердің мекен-жайлары анықталған. Бұл туралы облыстық ішкі істер департаментінің баспасөз қызметі хабарлайды.

Қалалық ішкі істер басқармасы ағымдағы жылдың 20-22 қыркүйегі аралығында «Борышкер» жедел алдын алу іс-шарасын өткізген. Оған көші-қон қызметінің қызметкерлері мен учаскелік полиция инспекторлары және сот орындаушылардан құралған мобилдік топ жұмылдырылыпты.

Көші-қон қызметі басқармасының инспекторы Н.Бисекеновтың айтуынша, шара кезінде мүдделі органдармен тығыз байланыс орнатылып, борышкерлер туралы ақпараттар алмасылған. Осы бағытта жүргізілген жұмыстарға сәйкес іздеудегі 5 борышкердің қазіргі уақытта республиканың өзге өңірлерінде тұрып жатқандығы белгілі болып, жазбаша түсініктемелері алынды.

Жалпы борышкерлерді іздестіру жұмыстары тұрақты жүргізіліп келеді. Ең бастысы төлемнен жалтармай, заңға бағынғанның артықтығы жоқ.

Айқара Ғұмар