Атырау Мұнай өңдеу зауытының жаңа станциясы іске қосылды (ФОТО)

Атырау Мұнай өңдеу зауытының жаңа станциясы іске қосылды. Бұл зауыттың жүк ағынын қала аумағынан тыс жерге шығаруға мүмкіндік береді. Тиісінше, аталған жоба экологиялық, өндірістік қауіптерді сейілтпек.

«РТИ-АНПЗ» ЖШС жобасы көлік инфрақұрылымын дамыту бағдарламасы аясында жүзеге асқан, зауыт жұмысының тиімділігін арттыруға бағытталып отыр.

Бүгінде компания «Теңдік» станциясын қайта жаңғыртудан өткізіп, темір жол, вокзал ғимараты, инженерлік коммуникацияны жаңартқан. Сонымен қатар, нысанның аумағын да абаттандырыпты.

«Бір кездері цистерналарды буландыру, құю, төгу жұмыстары қала аумағында жасалды. Қазір осы станцияның арқасында бұл жұмыстар қаладан 8 шақырым жерде жүргізіледі. Бұл Атырау Мұнай өңдеу зауытының қоршаған ортаға əсерін азайтып, ауаның тазалығын қалыптастырады»,-деді нысанның салтанатты ашылуына қатысқан облыс əкімі Нұрлан Ноғаев.

Тоқтала кетейік, жаңа жоба аясында 367 жұмыс орны құрылған.

Айқара Ғұмар

Суреттерді түсірген: Ерлан Алтыбаев