Елбасы Нұрсұлтан Әбішұлы Назарбаевтың «Болашаққа бағдар: рухани жаңғыру» мақаласындағы басым міндеттерді насихаттау мақсатында «Атырау-Ақпарат» медиасеріктестігі қолға алған «Туған жер» атты этно-мәдени шарасы бүгін Исатай ауданында жалғасын тапты.
Облыс өмірін баспасөз бетінде өрнектеп келе жатқан шығармашылық ұжымды аудан әкімдігінің өкілдері бастап қарсы алды. Бірлігі бекем, мерейі үстем шығармашылық ұжымның аудандағы сапары бүгін «ЖайықМұнайГаз» мұнай-газ өндіру басқармасының Салтанат Балғымбаев кен орнында мұнайшылармен кездесуден басталды. Мұнайлы өңір Атыраудың даңқын асқақтатып жүрген Салтанат Балғымбаев кен орнының мұнайшыларына Исатай ауданы әкімінің орынбасары Бейбіт Мырзағалиев және «Атырау-Ақпарат» медиасеріктестігі директорының орынбасары Рауан Сәбитұлы бастаған бір топ қарымды қаламгерлер Елбасы Нұрсұлтан Назарбаевтың «Болашаққа бағдар: рухани жаңғыру» мақаласы бойынша кеңінен әңгіме өрбітіп, жан-жақты түсіндірді.
Облыстық «Атырау» газеті бас редакторының орынбасары Нұрлан Қабылов Президент мақаласындағы айтылған ойларға кеңінен тоқталса, «Прикаспийская коммуна» газетінің бас редакторы Нәсіп Шалабаева Елбасы белгілеген басым бағыттар туралы әңгімеледі.
Сондай-ақ, «Атырау» газетінің шолушысы Бақытжан Жұмат, «Прикаспийская коммуна» газетінің арнаулы тілшісі Қаршыға Көшековтер де рухани жаңғыруға бет алған мемлекетіміздің өміріндегі елеулі өзгерістерге тоқталды.
Кездесу барысында аталмыш кен орнының мұнайшылары Елбасы мақаласына байланысты байланысты өз сауалдарын қойып, тұщымды жауаптар ала білді.
Нұрсұлтан ЕРТУҒАНҰЛЫ
Суреттерді түсірген: Әнуар ӘБІЛҒАЗИЕВ
