1200 орындық концерт залы мен облыстық тарихи-өлкетану музейінің іргетасы қаланды

Admin29.08.2025 13:16

Атырау — мұнайдың мекені ғана емес, мәдениеттің де алтын ордасына айналмақ. Өңірде еліміздің батыс аймағы бойынша ең үлкен мәдениет орталығы бой көтермек. Бүгін 1200 орындық концерт залы мен облыстық тарихи-өлкетану музейінің салтанатты жағдайда іргетасы қаланды.

Халқымыздың мәдени мұрасын ұлықтайтын қасиетті өнер ордасы, ерекше сәулет туындысы 5 гектар жерге орналасып, жалпы көлемі 34600 шаршы метрді құрайды. Конституция күні қарсаңында іргетасы қаланған жаңа құрылыс нысанының салтанатына облыс әкімі Серік Шәпкенов қатысып, барша атыраулықты айтулы мерекемен құттықтады.

–Тәуелсіздігіміздің арқасында еліміз қарқынды дамып келеді. Мемлекет басшысының тапсырмасына сәйкес жаңадан бой көтеретін мәдени нысан сол сөзіміздің айқын дәлеліндей. Ел аузында «Атырауға барып күйшімін деме» деген сөз жиә айтылады. Ендеше қасиетті қара омбыра үні күмбірлеген өңір күйшілердің орталығы мен Отанына айналады деген сенімдемін. Жалпы, орталық үш бөліктен құралады. Музейде – өлкеміздің тарихы сыр шертсе, екінші залда – өнерсүйер халыққа арналған концерттер өтеді. Ал үшіншіибөлік күй атасы – Құрманғазының атымен аталады,-деді Серік Жамбылұлы.

Ал Қазақстанның халық әртісі, күйші Айгүл Үлкенбаева заманға сай сәулетті ғимараттың ел үшін де, өзі үшін орны ерекше екендігін атап айтты. «Талай тарландарды түлеткен, тарихы тереңнен сыр шертетін Атырауда екі бірдей нысанның іргетасы қалануы – ел мәдениетіндегі маңызды оқиға. Сәулетті ғимараттардың бабалардың жолын танитын, халықтың рухын көтеретін, қазақтың әні мен күйін асқақтатын орынға айналатын екеніне сенімім мол. Өлкетану музейі – мен үшін қашанда ыстық орын. Өйткені әкем Нариман Үлкенбайұлы осында ұзақ жылдар бойы басшылық қызметті болды. Сол кісілердің армандап,қолдары жетпей кеткен тарихи күнде салатанттың өтіп жатқан куәсі болу мен үшін үлкен қуаныш. Жаңа нысан елдің игілігіне жарасын,-деді ол.

Сондай-ақ салтанатты шара барысында облыстық ардагерлер кеңесінің төрағасы Мұрат Өтешов те сөз алып, жаңа нысанның ерекшелігі мен маңыздылығына тоқталды.

Облыстық құрылыс басқармасының басшысы Нұрберген Құсайыновтың айтуынша, жаңа мәдениет кешені үш функционалды блоктан тұрады. 1200 орындық негізгі концерт залында 12 орындық VIP-бөлме, көрермендерге арналған буфеттер, екі конференц-зал, сахна, оркестрлік орын, репетициялық залдар, дыбыс жазу студиясы орналасады.

Тарихи-өлкетану музейі блогында ғылыми және танымдық бағыттағы нысандар қамтылады. Атап айтқанда, цифрлық және ғылыми кітапхана, ғылыми-зертханалық кешен, шеберлік бөлмелер, архивтік қор сақтау орындары, конференц-зал, әкспозициялық кеңістіктер болады.

– «Домбыра» монументіндегі көрініс алаңында кассалық галерея, қосалқы қызметтік бөлмелер, құрғақсубұрқақ орналасады. Серуендеуге арналған орындықтар қойылады. Абаттандыру жұмыстары да назардан тыс қалмайды. Бас мердігер — «Аспан Холдинг» компаниясы. Аталған нысан құрылысы екі жылға созылып, 2028 жылы пайдалануға беріледі деп күтілуде,-дейді Нұрберген Құсайынов.