Наурыз тойы театр алаңында тойлануда (+ФОТО)
Махамбет атындағы академиялық қазақ драма театры алаңында наурыз мерекесіне арнап ұйымдастырылған концерттік бағдарлама көпшілікке көтеріңкі көңіл-күй сыйлады.
Шараға облыс әкімі Махамбет Досмұхамбетов қатысып, жиналған қауымды мерекемен құттықтады.
«Қадірменді жерлестер! Күн мен түн теңесіп, қыстың қаһары қайтып, байтақ дала ару көктемнің арайлы шуағымен нұрланатын Наурыз – жыл басы, жақсылықтың бастауы. Қайта түлеген табиғатпен қатар адамның да санасы жаңғырар кез. Мемлекет басшысы Қасым-Жомарт Тоқаевтың бастамасымен елді соны кезеңге шығарып, Жаңа Қазақстан құру жолындағы істеріміз баянды болғай! Ұлыстың ұлы мейрамы халқымызды береке мен бірлік, ырыс пен ынтымақ, өрлеу, өркендеу жолына бастағай. Төрткүл дүние теңселіп тұрған шақта еліміз бейбіт өмір сүріп, айналамыз аман болғай. Құт-береке арқауы – əз-Наурыз əр шаңыраққа молшылық сыйласын! Ақ мол болсын, ұлыс оң болсын, ағайын!» деді өңір басшысы.
Өз кезегінде өнерпаздар ұттық киімде ән салып, би билеп мерекенің көрігін қыздырды.
Диас НАУРЫЗӘЛИЕВ
Суреттерді түсірген: Ерлан АЛТЫБАЕВ
