Қазақстан мен Қытай бірлескен жобаларды бастайды
Мемлекет басшысы Қасым-Жомарт Тоқаевтың Қытай Халық Республикасына жасаған ресми сапары – Қазақстанның сыртқы саясатындағы теңгерімді бағыттың, көпвекторлы дипломатияның және ұлттық мүддеге негізделген прагматикалық көзқарастың нақты көрінісі. Бұл сапар аясында өткен жоғары деңгейдегі келіссөздер мен стратегиялық келісімдер Қазақстан мен Қытай арасындағы жан-жақты серіктестікті жаңа деңгейге көтеретіні анық.
Президент Қасым-Жомарт Тоқаев атап өткендей, қазіргі таңда Қазақстан экономикасы орнықты өсім көрсетіп отыр. Елдің басты мақсаты – 2025 жылға дейін жалпы ішкі өнімді 300 миллиард АҚШ долларына жеткізу. Бұл – ірі экономикалық трансформацияларды талап ететін батыл мақсат. Бұл ретте көлік-логистика, ауыл шаруашылығы, энергетика, өңдеу өнеркәсібі, жасанды интеллект және жоғары технологиялар саласындағы ынтымақтастықтың тереңдеуі аса маңызды.
Қытай – әлемдегі жетекші экономикалық державалардың бірі ретінде Қазақстан үшін сенімді серіктес әрі ірі инвестор. Қытайдың технологиялық тәжірибесін, цифрлық шешімдерін және инновациялық әлеуетін Қазақстанмен бөлісуі – өзара тиімді әрі ұзақ мерзімді экономикалық әріптестіктің белгісі. Осы сапар барысында қол қойылған келісімдер – индустрия, көлік, ауыл шаруашылығы мен «жасыл» технологияларды дамытудағы нақты жобаларға жол ашады.
Бейжіңде Қазақ мәдени орталығының ашылуы – Қазақстанның «мәдени дипломатия» бағытын жүйелі түрде жүргізіп келе жатқанын айғақтайды. Бұл тек символдық акт қана емес, ол – халықтар арасындағы сенімді, достықты, рухани үндестікті нығайтуға бағытталған мазмұнды платформа. Президенттің: «Ұлы дала мен Ұлы Қытай арасындағы рухани-мәдени байланыс ешқашан үзілген емес» деген сөзі – тарихи сабақтастықты мойындау ғана емес, екі мемлекеттің болашақтағы рухани ынтымақтастығының да бағдарын айқындайды.
Сондай-ақ, қазақ және қытай жастары арасындағы білім және технология саласындағы байланыстарды нығайту, бірлескен жобалар мен зерттеулер жүргізу – екі елдің ғылыми-инновациялық дамуына серпін бермек.
Жалпы, бұл сапар Қазақстанның халықаралық беделін одан әрі нығайтып, еліміздің жаһандық экономикаға интеграциялануына жол ашады. Бұл – нақты нәтижеге бағытталған прагматикалық сыртқы саясаттың жемісі әрі ел мүддесіне қызмет ететін маңызды дипломатиялық жетістік.
Абылай ҚҰРМЕТҰЛЫ,
«АМАNАТ» партиясы жанындағы «Жастар рухы» жастар қанатының төрағасы
