Мемлекеттік қызмет – жауапкершілігі мол міндет
Қазақстан Республикасының мемлекеттік қызметі туралы заңнамасының негізгі қағидаттарының бірі – заңдылық қағидаты. Осы ретте Мемлекеттік қызмет істері агенттігінің Атырау облысы бойынша департаментінің мемлекеттік қызмет саласындағы бақылау басқармасымен тұрақты негізде (онлайн формат және тікелей эфирді қоса алғанда) мемлекеттік қызметшілерге құқықтық оқытулар өткізіліп келеді.
Қазақстан Республикасының азаматтары мемлекеттік қызметші мәртебесіне мемлекеттік лауазымға тағайындалған немесе сайланған сәттен бастап ие болады және мемлекеттік қызмет туралы заңнамаға сәйкес, тиісті құқықтары, міндеттері мен жауапкершілігі туындайды.
Міндеттері мен жауапкершілігіне келер болсақ, мемлекеттік қызметші — мемлекеттің міндеттері мен функцияларын іске асыру мақсатында лауазымдық өкілеттіктерін қалтқысыз әрі адал атқаруы тиіс. Бұл ретте мемлекеттік қызметшіге өзінің лауазымдық өкілеттіктерін орындамағаны, республика мемлекеттік қызметшілерінің Әдеп кодексін сақтамағаны немесе өзге де қолданыстағы заңнама талаптарын бұзғаны үшін тиісті жауапкершілік көзделген.
Бұдан басқа, «Қазақстан Республикасының мемлекеттік қызметі туралы» Заңның талаптарына сәйкес, мемлекеттік қызметші өзіне тиісті құқықтарды иемденеді. Яғни, еңбегінің қорғалуына, денсаулығының сақталуына, қауіпсіз және тиімді жұмыс істеу үшін қажетті еңбек жағдайларына, әлеуметтік және құқықтық қорғалуға және т.б. құқықтары бар.
Осы орайда Қазақстан Республикасы Мемлекеттік қызмет істері агенттігінің Атырау облысы бойынша департаментімен құқықтық оқытулар өткізу барысында мемлекеттік қызметшілердің құқықтары, міндеттері мен жауапкершіліктеріне қатысты түсіндірмелер берілуде.
Өз кезегінде, мемлекеттік қызметші қызметін атқару шегінде барынша ұқыпты, адал, сыпайы, кез келген жағдайда өзгелерге үлгі бола білуі қажет.
Сонымен қатар, олар қызметтен тыс уақытта да қоғамға жат мінез-құлықтарға, оның ішінде қоғамдық орындарда адамның қадір-қасиетіне және қоғамдағы адамгершілікке нұқсан келтіретін іс-әрекеттерге жол бермеуге тиіс. Сондай-ақ, сырт келбеті де қызметтік міндеттерін орындау кезінде мемлекеттік аппараттың беделін нығайтуға ықпал етуі шарт.
Мемлекеттік қызмет істері агенттігі Атырау облысы бойынша департаментінің баспасөз қызметі
