Құқықтық тәртіптің жаңа кезеңі

Елімізде Ішкі істер министрлігінің Басқару академиясының ашылуы – құқық қорғау жүйесінің сапалы жаңғыруының жарқын дәлелі. Бұл бастама тек кадр дайындаумен шектелмейді, ол бүкіл құқық қорғау құрылымының парадигмасын өзгертеді. Яғни, бұрынғы күштік үлгіден — сервистік, азаматқа бағдарланған, технологиямен қаруланған заманауи жүйеге көшу бастамасы.

Президент Қасым-Жомарт Тоқаев жариялаған “Заң және тәртіп” апталығы аясында ашылған бұл академия — жүйелі реформалардың заңды жалғасы. Премьер-министр Олжаc Бектенов айтқандай, жаңа буын басшыларын даярлау, оларды стратегиялық ойлауға және басқару шешімдерін дәлелді қабылдауға үйрету — уақыт талабы.

Бүгінгі күрделі сын-қатерлер – киберқылмыс, есірткі трафигі, тұрмыстық зорлық, көшедегі қауіпсіздік – бұлардың бәрі заманауи тәсіл мен технологияны қажет етеді. Академия базасында цифрлық зертхана, жасанды интеллектке негізделген талдау құралдары, “ақылды” құрылғылар, роботтандырылған жүйелердің қолданылуы – Қазақстан құқық қорғау саласының болашағына салынған инвестиция.

Бұл жоба — құқық қорғау органдарының қоғаммен байланысын жаңа деңгейге көтеретін бастама. Өйткені кәсіби басқарушылардың пайда болуы — құқықтың үстемдігін, азаматтардың қауіпсіздігін, ал ең бастысы, халықтың сенімін қамтамасыз етудің негізі.

Абдолла ИДРЕСОВ,

«AMANAT» партиясы Атырау облыстық филиалының төрағасы,
облыстық мәслихат депутаты