Конституция – Тәуелсіздіктің тірегі

Қазақстан Республикасының Конституциясы – мемлекетіміздің негізгі заңы, бүкіл құқықтық жүйеміздің іргетасы. 1995 жылы бүкілхалықтық референдумда қабылданған осы Ата Заң тәуелсіз еліміздің даму бағытын айқындап, халық бірлігінің кепіліне айналды.

Мен – сол 1995 жылдың құрдасымын. Демек, Конституция менің өміріммен қатар жасап келеді. Ата Заңның әр бабында біздің құқықтарымыз бен бостандықтарымыз бекітілген. Конституция бізге тең мүмкіндіктер сыйлап, Қазақстан халқының татулығы мен берекесін қамтамасыз етуде. Сондықтан оны құрметтеу – әр қазақстандықтың парызы.

Ұлттық ұланның 5546 әскери бөлімінде қызмет етіп жүрген әскери қызметші ретінде менің міндетім – қоғамдық тәртіпті сақтау, азаматтардың қауіпсіздігін қамтамасыз ету. Бұл – Конституцияда айқын жазылған негізгі қағидалардың бірі. Әскердегі әрбір күн бізге Ата Заңымызды қорғаудың, елге адал қызмет етудің қаншалықты маңызды екенін дәлелдейді.

Бүгінде тәуелсіз Қазақстанымыз түрлі сынақтардан сүрінбей өтіп, әлемдік қауымдастықта өзінің орнын айқындады. Осы жетістіктің бәрінің түп негізінде – 30 тамызда қабылданған Конституция тұр. Ол бізді болашаққа жетелейтін бағыт-бағдар, тұрақтылықтың тірегі.

Құрметті жерлестер, қадірлі отандастар!
Сіздерді Қазақстан Республикасының Конституциясы күнімен шын жүректен құттықтаймын! Әр шаңырақта бейбітшілік пен береке орнасын. Еліміздің еңсесі биік болып, тәуелсіздігіміз мәңгі жасай берсін!

Ноғайбай САПАРҒАЛИЕВ,
Қазақстан Республикасы Ұлттық ұланы 5546 әскери бөлімінің офицері