Халықтың құқықтық сауаттылығын арттыру – басты мақсат

Бүгінгі жиында “AMANAT” партиясы облыстық филиалының, әділет департаментінің, Заңгерлер одағының, Адвокаттар алқасы мен Жеке сот орындаушылар мен Нотариаттар палаталарының басшылары, Адам құқықтары жөніндегі уәкілдің Атырау облысы бойынша өкілі бас қосты. Олар “Құқықтық көмек” партиялық жобасын жүзеге асыру шеңберінде өзара ынтымақтастық туралы Меморандумға қол қойды.

Кездесу кезінде “AMANAT” партиясы облыстық филиалының төрағасы Абдолла Идресов аудан орталықтарында кәсіби заңгерлердің тапшы болуына байланысты облыс орталығынан мобильді топ құру қажеттілігі туындағанына тоқталды.

-Бүгінгі Меморандум аясында сіздермен бірлесе отырып, заңгер көмегіне зәру тұрғындарға жан-жақты құқықтық көмек бере аламыз деп сенемін, — деді Абдолла Хамиұлы.

Айта кетейік, 2019 жылдан бері Заңгерлер одағы, Медиация орталығы және Адвокаттар алқасымен Ынтымақтастық меморандумы жасалған болатын. Осы құжат негізінде заңгер, нотариус, адвокат, медиатор және сот орындаушыларымен бірге 2023 жылы 35 қабылдауда — 152, өткен жылы 38 қабылдауда 310 адамға тегін құқықтық көмек көрсетілді. Былтыр 162 азаматтың мәселесі оң шешімін тауып, 148-іне қолданыстағы заңдылық аясында түсініктер берілді.

Рита ӨТЕУҒАЛИ
Суреттерді түсірген Ерлан АЛТЫБАЕВ