Әскери бөлімде жас сарбаздарға қару табысталды

Атырау қаласындағы Қазақстан Республикасы Ұлттық ұланының 5546 әскери бөлімінде Отанға адал болуға ант берген 200-ден астам жас сарбазға салтанатты түрде қару табысталды. Бұл туралы Қазақстан Республикасы Ұлттық ұланы “Батыс” өңірлік қолбасшылығының баспасөз қызметі хабарлады.

Жиын әскери бөлімнің саптық алаңында өтті. Қатар түзеген жас жауынгерлерді бөлім командирі, подполковник Самет Құлахмедов құттықтап, ізгі тілектерін білдірді.

— Кеше ғана Отанға адал қызмет етемін деп әскери ант қабылдаған сіздерге бүгін жауынгерлік қару табысталып отыр. Бұл — үлкен жауапкершілік. Қарумен бір жыл бойы жауынгерлік міндеттеріңізді атқаратын боласыздар. Қызметтеріңізге сәттілік тілеймін. Еліміздің бейбіт аспаны астында қаруды тек оқу-жаттығу мақсатында ғана қолданатын болыңыздар, — деді бөлім командирі.

Салтанатты рәсім жас сарбаздардың рухын көтеріп, әскери борышқа деген жауапкершіліктерін нығайтты. Алдағы уақытта олар Атырау қаласының тыныштығы мен қауіпсіздігін қамтамасыз етуге өз үлестерін қосатын болады.