Қоғамдық қауіпсіздік – басты назарда

Атырау облысында құқық бұзушылықтардың алдын алу және қоғамдық қауіпсіздікті қамтамасыз ету мақсатында қыркүйектің 1-інен қарашаның 1-іне дейін республикалық «Учаске» жедел-профилактикалық іс-шарасы өтуде.
Бұл шара аясында учаскелік полиция инспекторлары өздеріне бекітілген әкімшілік аумақтарда тұрғын үйлерді аралап, түсіндіру жұмыстарын жүргізіп, профилактикалық рейдтер ұйымдастыруда.

Іс-шара басталғалы бері облыс аумағында 28 824 тұрғын үй мен 400-ге жуық қыстақ пен шаруа қожалығы тексерілді. Жалпы қалада 1694 қыстақ бар екені белгілі. Аралау жұмыстары барысында 50 заңсыз жалдамалы пәтер анықталса, қару сақтау ережесін бұзған 6 азамат әкімшілік жауапкершілікке тартылды.
Кәмелетке толмағандар арасындағы құқық бұзушылықтың алдын алу бағытында да бірқатар шаралар атқарылды. Қоғамдағы тәртіпті бұзған 80-ге жуық жасөспірім анықталып, тиісті шара қолданылды. Сонымен қатар, қоғамдық тәртіпті бұзған 2000-нан астам азамат әкімшілік жауапкершілікке тартылды.
Бүгінде №1 қалалық полиция бөлімінің учаскелік полиция инспекторлары өздеріне бекітілген мекенжайлардағы шаруа және фермер қожалықтарын, ауыл шаруашылығы алқаптарын, қыстақтарды аралап, қауіпсіздік талаптарының сақталуын тексеріп жатыр.
Республикалық «Учаске» іс-шарасы – полиция мен тұрғындар арасындағы өзара сенімді нығайтып, құқық бұзушылықтың алдын алуға бағытталған жүйелі жұмыстардың бір көрінісі.

Майра ЕРҒАЛИ