ҚАМКӨҢІЛ БАЛАЛАРДЫ ОНЛАЙН-ҚОЛДАУ
Бүгінгі күні облысымызда 2245 мүмкіндігі шектеулі бала бар. Диагностика мен скринингтік тексерістер, әлеуметтік мәнді аурулар мен жарақаттарды оңалту жұмыстарына қарамастан, балалар арасында мүгедектікке шалдығу көптеп тіркелуде.
— Мемлекеттік бюджеттен әлеуметтік жәрдемақылар төленіп, мүгедек бала тәрбиелейтін отбасыларына стационарлық және үйден қызмет көрсетіледі. Солай бола тұрса да, ата-аналар балаларын білікті мамандарға тапсырудан қорқады, — дейді Б.Өтеғалиева.
Сондай-ақ, шалғай өңірлердің бәрі бірдей күндізгі бөлімшелермен қамтыла қойған жоқ. Міне, жаңа қызмет түрі осы олқылықтың орнын толтырмақ. Басты міндет – отбасына қолайлы әлеуметтік-психологиялық ахуал тудыру болып табылады. Аталмыш жоба Қазақстан Республикасы денсаулық сақтау және әлеуметтік даму министрлігінің бастамасымен, Зейнетақы төлеу жөніндегі мемлекеттік орталығы және Қазақстан-Ресей медициналық университетінің қолдауымен іске асуда.
Айта кету керек, қолдау көрсету бағдарламасы тек мүгедек балаларды тәрбиелеуші ата-аналармен ғана жүзеге асырылады. Ал, Зейнетақы төлеу жөніндегі мемлекеттік орталығы оператор қызметін атқарады. Қазақстан-Ресей медициналық университетінің психиатрия, наркология кафедрасының білікті мамандары жүйке аурулары, медициналық психология және педагогика курстары бойынша кеңес беретін болады. Қызмет барысы интернет-ресурс мүмкіндіктерін пайдалану, соның ішінде «Скайп» бағдарламасы арқылы ұйымдастырылмақ.
Аталған қызмет түрін пайдаланушы 1411 нөміріне қоңырау шалып, кезекке тұрады. Осы ретте өтініш берушінің аты-жөні, тегі, уақыты, байланыс телефоны, орналасқан аймағы туралы мәліметтер сұралады. Ал, мүгедектігі барлардың орталықтандырылған базасында тіркелмеген баланың қамқоршысы жаңа тіркелімге сұраныс жолдауы керек.
Амандық САҒЫНТАЙҰЛЫ.
