Ерекше балаларды қоғамға бейімдеудің жолдары қандай?
Х.Досмұхамедов атындағы Атырау университетінде “Аутист балаларды әлеуметтік ортаға бейімдеудің әдіс-тәсілдері” атты аймақтық форум өтті. Жиынға білім және денсаулық сақтау саласының мамандары, педагогтар, психологтар, дефектологтар, логопедтер, қоғамдық ұйым өкілдері және ата-аналар қатысты, — деп хабарлайды Өңірлік коммуникациялар қызметі.
Қазір психологиялық-педагогикалық түзеу кабинеті орталығында 78 бала түзету-дамыту бағдарламасынан өтуде, биылғы оқу жылы аяқталғанша 300-ге тарта балаға тегін қолдау көрсетілмек.
Дефектолог маман Жанар Бекжанованың айтуынша, ата-ана баласында аутизм белгілерін ерте анықтау үшін арнайы тексерулер мен бағалаулар жүргізілуі тиіс.
-Егер сәбиіңіз тоқтаусыз жыласа, оны жұбату қиынға болса немесе 2-3 айлық кезінде ата-анасына қарап күлімсіреу сияқты эмоциялық реакциялар байқалмаса, ерекше назар аудару қажет. Мұндай белгілер баланың жайсыздығын немесе дамудағы ақау бар екені көрсетуі мүмкін. Сондықтан міндетті түрде педиатр немесе балалар неврологы сияқты мамандарға жүгіну ұсынылады,- деді дефектолог.
Форум барысында АВА-терапия, TEACCH әдісі, PECS жүйесі, топтық терапия, сенсорлық интеграция сияқты ғылыми дәлелденген әдістердің тиімділігі қарастырылды.
Форумға қатысушылардың арасында ерекше бала тәрбиелеп отырған құлсарылық Сабира Сейтжановада бар. Ата-ана топтық терапия, ава-терапия тәсілдерінің арқасында қазір перзентінің жағдайы жақсы екенін айтты.
-Менің балама екі жарым жасында төрт түрлі диагноз қойылды. Сол кезде алдыма нақты мақсат қойып, баламды бірінші сыныпқа дайындауға бел будым. Қазір балам 7 жасқа келіп, барлық диагнозынан айтарлықтай сауығып келеді. Ол бірінші сыныпты аяқтап, оқу мен жазуда үлкен жетістіктерге жетті, тіпті олимпиадаларда бірінші орындарға ие болуда. Ерекше балаларды тәрбиелеп отырған ата-аналарға айтарым: ешқашан мойымаңыздар, табандылық пен сенім арқылы көптеген жетістікке қол жеткізуге болады,-деді ол.
Аутизм белгілері бар балалармен жұмыс істейтін мамандарға қойылатын талап көп. «Олардың ішіне аутист балалармен жұмыс тәжірибесі, әр баланың қажеттіліктеріне бейімделе отырып жеке бағдарлама құру қабілеті, әр балаға жеке тәсіл табу, оның қызығушылықтарына сәйкес әдістерді меңгеру т.б. кіреді» дейді мамандар.
