Елімізде 2012 жылдан бастап селекциялық және тұқымдық жұмыстарды жүргізу үшін, алдымен, аналық мал басын субсидиялау, жоспарлау механизмін енгізуге көбірек көңіл бөлініп, назар аударылды. Бұған жалғаса осы саланы жан-жақты және кешенді түрде дамытуға бағытталған «Агробизнес-2020» бағдарламасының қабылданғандығы белгілі. Онда 2014 жылдың өзінде атакәсіп – мал шаруашылығын дамытуға республика қазынасынан бөлінетін қаражат көлемі қазіргіден 35 пайызға дейін ұлғайтылады. Биылғы жыл басынан бергі тоғыз айда төрт түліктің өсімі жоспарланған меженің 63 пайызын, ал қолдағы бар малдың саны 375 мыңды құраған. Алдағы екі жылда мүйізді ірі қара мал басы 25 пайызға көбейтіледі деп күтілуде.
Бұдан бөлек, бағдарламада қайта өңдеу кәсіпорындарына қажетті шикізатты сатып алуға жұмсалатын шығындардың бір бөлігін өтеудің жаңа механизмін енгізу жағы қарастырылған. Осы бағытта негізінен қант қызылшасынан ақ қант және сүттен сары май, ірімшік пен құрғақ сүт өндіру, бұл шараларға бюджеттен 52,5 млрд. теңге шығындау көзделген. Тұтастай алғанда, республикамыздың агроөнеркәсіп кешенін дамытуға 2020 жылға дейінгі мерзімде қазына қаражатынан барлығы 140 млрд. теңге сомасында қаржы жұмсау межеленген.
