Әділетті қоғам тәртіптен басталады

Мемлекет басшысы Қасым-Жомарт Тоқаевтың заң мен тәртіпті сақтау туралы пайымды пікірі – ел тағдыры үшін маңызды үндеу. Бұл – жай ғана сөз емес, ұлт ретінде өркендеуіміздің, мемлекет ретінде нығаюымыздың басты шарты екенін барша халыққа ұғындыру. «Заңды сыйлайтын ел – берекелі ел» деген Президенттің сөзіне мен толық қосыламын.

Мен сонау кеңестік кезеңде де, Тәуелсіздік жылдарында да түрлі еңбек майдандарында тер төктім. Сондағы бір байқағаным – қай салада болсын тәртіп пен талап болған жерде ғана ілгерілеу бар. Ал ол тәртіптің іргесі – заңға деген құрметтен басталады. Қазіргідей жаһандану мен ақпарат ағыны күшейген заманда жастарды құқықтық сауаттылық пен азаматтық жауапкершілікке тәрбиелеу – басты міндет.

Президент атап өткендей, құқықтық мәдениет отбасынан басталуы керек. Баланың алғашқы ұстазы – ата-ана. Сол себепті әрбір ата-ана өз ұл-қызына заңды құрметтеуді, әділеттілікті, шыншыл болуды үйретуі керек. Бұл бағытта мектеп пен мемлекеттің рөлі де зор. Құқықты қарапайым тілмен түсіндіру, нақты мысалдармен үйрету – жастардың сана-сезіміне оң әсер етеді.

Қоғамда заңға бағыну мен тәртіпті сақтау – өз құқығыңды ғана емес, өзгенің де құқығын құрметтей білу. Бұл – мәдениеттің ең биік формасы. Біз, ардагерлер, жас ұрпаққа өнеге болуға, тәрбиелік бағытта атсалысуға әрдайым дайынбыз. Өйткені, заң мен тәртіп салтанат құрған ел – болашағы жарқын мемлекет.

Президент көтерген бұл бастаманы жүрекпен қолдаймын, және әрбір азаматтың осы бағытта үлес қосуы – парызы деп білемін.

Дәмен АЛТАЕВА,

білім саласының ардагері, Мақат ауданының Құрметті азаматы