Ұлттық мұра мен мәдениет ұлықталды

Наурызнаманың мәдениет және ұлттық салт-дәстүрлер күні еліміздің ұлттық мұрасына деген құрметті күшейтіп, оны келешек ұрпаққа сақтап, жеткізудің маңызды екенін көрсетеді.
Осыған орай, Атырау қаласындағы «Исатай-Махамбет» алаңында Құрманғазы атындағы мәдениет сарайының көркемөнерпаздары ұйымдастырған «Наурыз-думан» атты мерекелік концерт қала тұрғындары үшін ұлттық болмыстың айшықты көрінісіне айналды.

Сахнада ән мен бидің шеберлікпен орындалуы халықтың мәдениетіне деген құрметтің ең жарқын көрінісі болды.
–Бұл іс-шара – қазақтың бай мұрасының қайта жаңғырып, ұрпақтан-ұрпаққа жеткізілуінің жарқын мысалы. Біздің мақсатымыз – ұлтымыздың ұлы дәстүрлерін ұлықтап, жастардың санасына ұлттық болмысымызды сіңіру. Наурыз мейрамы – табиғаттың жаңаруымен қатар, халықтың рухани жаңғыруының да символы. Бұндай іс-шараның жастарға, болашақ ұрпаққа үлкен тәрбиелік мәні өте зор. Сондықтан бұл күнді тойлау – тек халықтың мәдениетін тойлау емес, ол біздің өткенімізді қадірлеу, ұлттық құндылықтарымызды сақтап қалу және болашаққа аманат ету,- дейді Құрманғазы атындағы мәдениет сарайы басшысының міндетін уақытша атқарушы Марсель Нысанбаев.
Бұл күн ұлтымыздың рухани жаңғыруына, салт-дәстүріміздің қайта жаңарып, өркендеуіне, халықтың болашағына негіз қалаушы ұлттық құндылықтарды дәріптеп, оны жас ұрпаққа жеткізу арқылы еліміздің мәдени мұрасының ұлылығын танытты.

Тоғжан ЕРМЕК