Қазақстан Республикасының Конституциясы: 30 жылдық тарихы, маңызы және болашағы
Қазақстан Республикасының Конституциясы күніне орай «Конституцияның тарихи негіздері» атты ғылыми конференция өтті. Бұл маңызды шара Қазақстан Республикасының Ата Заңының 30 жылдығына арналып, елдің құқықтық, демократиялық және зайырлы мемлекет ретінде қалыптасуындағы Конституцияның рөлі мен маңызын талқылауға бағытталды.
Конференцияның негізгі мақсаты – Ата Заңымыздың тарихи маңызын саралап, оның қазіргі заманғы құқықтық жүйедегі орны мен болашағына ғылыми тұрғыдан баға беру, жастардың құқықтық мәдениетін арттыру, сондай-ақ Конституцияның еліміздегі қоғамдық және әлеуметтік өмірге қосқан үлесін талқылау болды.
Бұл шара Қазақстанның құқық қорғау жүйесінің өкілдері, ғылыми қызметкерлер мен студенттер арасында Ата Заңды насихаттау мақсатында өткізілді.
Шара Қазақстан Республикасының Әнұранының орындалуымен басталып, Атырау университетінің модераторы, профессор Саламат Идрисов құттықтау сөзімен жалғасты. Ол Конституцияның еліміздің дамуындағы маңызын атап өтіп, жиынның қатысушыларына сәттілік тіледі.
Алғашқы құттықтау сөз Атырау облысы прокурорының аға көмекшісі Оралбек Хамитке берілді. Ол өз сөзінде прокуратураның Ата Заңның кепілдіктерін іске асырудағы рөлі туралы баяндады. Келесі сөзді Атырау облысының Полиция департаменті Тәрбие және кадр жұмысы басқармасының бастығы Нұржан Шаеденов алып, университетпен тығыз ынтымақтастықта жұмыс істейтіндерін атап өтті. Қазақстан Республикасы Адам құқықтары жөніндегі уәкілдің Атырау облысы бойынша өкілі Аманкелді Абдолов «Адам құқықтары – ең жоғары демократиялық құндылық» тақырыбында баяндамасын ұсынды. Тарих ғылымдарының докторы, профессор Аққали Ахмет «Сан қилы жолдан өткен Ата Заң» тақырыбында баяндама жасап, Конституцияның Қазақстанның тәуелсіздік жолындағы рөлін жан-жақты ашып көрсетті. Тарих ғылымдарының докторы, профессор Сайфолла Сапанов «Конституционное развитие и трансформация политической системы Казахстана в XXI веке» тақырыбында баяндама жасап, Ата Заңның өзгеру барысындағы саяси және құқықтық даму үрдісін талқылады.
Айтулы іс-шарада Қазақстан Республикасының Конституциясы күніне орай өткен «Мен Конституцияны атқа білемін!» байқауының жеңімпаздары марапатталды. Бұл байқау 2015 жылдан бері дәстүрлі түрде ұйымдастырылып келеді және биылғы жылы да үлкен қызығушылық тудырды. Байқауға 40-тан астам студент қатысып, қазылар алқасы үздік үштікті анықтады. Жеңімпаздарға арнайы сертификаттар мен марапаттар табысталды. Конференция соңында еліміздің білім беру саласына қосқан үлестері үшін бірқатар ғалымдар мен қызметкерлер марапатталды. Қазақстан Республикасы Ғылым және жоғары білім министрлігінің «Ғылымды дамытуға сіңірген еңбегі үшін» төсбелгісі мен «Еңбек ардагері» төсбелгісі белгілі ғалымдар мен профессорларға табысталды. Сонымен қатар университет ректорының Алғыс хаттары мен Қазақстан Республикасы Ғылым және жоғары білім министрлігінің «Құрмет грамоталары» бірнеше қызметкерге берілді.
Конференция Қазақстан Республикасы Конституциясының 30 жылдығына арналған маңызды әрі мазмұнды шара болды. Ол ғылым мен білім саласының өкілдері, құқық қорғау органдарының қызметкерлері, сондай-ақ студенттер арасында терең қызығушылық туғызып, еліміздің құқықтық мәдениетін дамытудағы маңызды қадам болды. Шара барысында Ата Заңымыздың тарихи мәні мен оның қазіргі заманғы құқықтық жүйедегі орны жан-жақты талқыланды.
Тоғжан ЕРМЕК
