АМӨЗ «ҚазТрансГазАймақтан» газ сатып алу туралы келісім жасады
Мемлекет басшысы Қасым-Жомарт Тоқаевтың «соңғы шақырым» туралы және «Самұрық-Қазына» АҚ Басқарма төрағасы Нұрлан Жақыповтың табиғи газды тікелей «QazaqGaz» АҚ ҰҚ-дан сатып алу жөнінде тапсырмасын орындау мақсатында Атырау мұнай өңдеу зауыты «ҚазТрансГазАймақтан» газ жеткізу туралы келісім жасады.
2024 жылдың 6 наурызында «АМӨЗ» ЖШС газбен жабдықтаушы кәсіпорыннан өнімнің алғашқы партиясын қабылдады. Қазіргі таңда газ қабылдау жұмыстары штаттық режимде жүргізілуде.
2024 жылы «АМӨЗ» ЖШС-ның отын газын тұтыну көлемі 130 млн текше метрді құрайды деп күтілуде, бұл шамамен 700 млн тенге қаражатты үнемдеуге мүмкіндік береді.
Айта кетейік, Атырау мұнай өңдеу зауыты 2004 жылдан бері технологиялық пештерде жағу үшін ең экологиялық таза отын түрлерінің бірі – табиғи газды пайдаланады.
