«Атырау» газеті шығармашылық байқау жариялады

Атырау облысында ауыл шаруашылығының дамуын насихаттау мақсатында шығармашылық байқау жарияланды. Оны ұйымдастырушы – «Атырау-Ақпарат» ЖШС облыстық «Атырау» қоғамдық-саяси газеті.

Байқау белгілі қаламгер, газеттің бұрынғы бас редакторы Құмар Кенжеғалиевтің туғанына 90 жыл толуына орай қолға алынған. Бастама өңірдегі ауыл шаруашылығы саласының дамуына ықпал етіп жүрген журналистер мен шығармашылық қауым өкілдерін ынталандыруға бағытталып отыр.

«Атырау-Ақпарат» ЖШС облыстық «Атырау» қоғамдық-саяси газетінің

Атырау облысында ауыл шаруашылығының дамуын насихаттау мақсатындағы

ШЫҒАРМАШЫЛЫҚ БАЙҚАУДЫҢ ЕРЕЖЕСІ

І. Жалпы ережелер

1. Байқауды ұйымдастырушы: «Атырау-Ақпарат» ЖШС облыстық «Атырау» қоғамдық-саяси газеті. Мекен-жайы: Атырау қаласы, Ө.Атамбаев көшесі, 7 г.

2. Атырау облысындағы ауыл шаруашылығы саласының дамуытақырыбына арналған жергілікті журналистер арасындағы шығармашылық байқау (бұдан әрі – Байқау) өңірлік ауыл шаруашылығы саласының дамуытуралы үздік жарияланым, репортаж, т.с.с. сараптамалық мақалалар авторларын ынталандыру мақсатында өткізіледі.

Байқау мақсаттары:

• облыстағы ауыл шаруашылығының дамуына, сондай-ақ мемлекет басшысының бастамалары мен елдің агрокешенін дамытуға жағдай жасау туралы тақырыптарды жариялауға журналистердің назарын аудару;
• тақырыпқа сәйкес тың жоба, озық тәжірибелерді насихаттау, көпшіліктің назарын саладағы проблемаларға аудару.

3. Байқауға келіп түскен материалдарды комиссия (бұдан əрі – Комиссия) бағалайды. Комиссия 5 (бес) адамнан құралады, оның құрамына облыстың медиа саласының дамуына зор үлес қосқан сала ардагерлері мен қоғам өкілдері кіреді.

4. Комиссия жеңімпаздарды таңдау кезінде мына талаптарды басшылыққа алады:

— материалдардың объективтілігі;

— қозғалатын мәселелердің және оларды шығармашылық талдаудың тереңдігі;

— материалдардың қоғамдық резонанс туғызуы;

— материалдардың шығармашылық тұрғыда өміршеңдігі.

ІІ. Байқауға қатысу шарттары

1. Байқауға облыстық «Атырау» қоғамдық-саяси газетінде жəне оның www.atr.kz сайты мен әлеуметтік желілердегі парақшаларында жарияланған хабарландыруда ұсынылған тақырыпқа сəйкес келетін бағытта жазылған жəне «Байқауға» деген айдар қойылған материалдар қабылданады.

2. Байқауға облыс ауыл шаруашылығы саласының дамуы тақырыбында жазылып, 2025 жылдың 1 сәуірі мен 15 маусымы аралығында (қоса алғанда) газеттің www.atr.kz сайтында жарық көрген материалдар қабылданады.

3. Байқау жұмыстарының материалдарына қойылатын талаптар:

— мәселенің көпқырлы талдануы, материалда көтерілген мәселелер бойынша тұжырымдардың практикалық қолданылуы және эксклюзивтілігі бағаланады;

— баспа материалының көлемі А-4 үлгісінде Times New Roman 12 көлемді қаріппен 4 (төрт) беттен аспауы тиіс;

— материалдар мемлекеттік тілде жазылуы шарт.

4. Байқауға қатысатын жұмыстар жарияланған басылымның атауын, шыққан күнін (сілтеме арқылы) растай отырып, автор туралы ақпарат (қысқаша өмірбаян), 1 (бір) дана 3х4 үлгідегі фотосуреті, пошталық және электронды мекен-жайы, байланыс телефонымен (анықтама үшін) бірге редакцияның электронды поштасына ұсынылуы тиіс.

• Байқауға бұрын басқа басылымдарда немесе әлеуметтік желіде жарияланбаған материал мен суреттер қабылданады. Бұл жауапкершілік авторға жүктеледі;
• Байқауға 18-63 жас аралығындағы журналистердің қатысу мүмкіндігі бар.

5. Бір қатысушы бір материал ғана ұсына алады.

6. Байқауда Қазақстан Республикасының заңнамасында тыйым салынған (балағат сөздер, адамның қадір-қасиетін түсіретін, саяси, діни, ұлттық алауыздықты қоздыратын, т.б. теріс сипаттағы мәлімдемелер мен әрекеттер) элементтері бар жұмыстар қаралмайды және жарияланбайды.

7. Байқаудың тақырыбына, талаптарға сәйкес келмейтін, сондай-ақ қабылдау мерзімі өтіп кеткен соң келіп түскен материалдар байқауға қатыстырылмайды және жіберілген материалдар авторға қайтарылмайды.

8. Байқауды ұйымдастыру тобының байланыс деректері: тел. 8(702)7742374. Электронды пошта: atyrau_gazeti@mail.ru

ІІІ. Байқаудың қорытындысы

1. Байқау жеңімпаздарына газеттің 1978-1987 жж. Бас редакторы Құмар Кенжеғалиев атындағы диплом мен демеушілердің қолдауымен ақшалай сыйлықтар тапсырылады.

Жүлде қоры:

• І орын – 200 000 (екі жүз мың) теңге;
• ІІ орын – 150 000 (бір жүз елу мың) теңге;
• ІІІ орын – 100 000 (бір жүз мың) теңге.

Бұған қоса әрқайсысы 50 000 (елу мың) теңге мөлшерінде 4 (төрт) ынталандыру сыйлығы бар.

IV. Байқау материалдарын бағалау және іріктеу тәртібі

1. Байқау материалдарын бағалау кезінде төмендегі талаптар ескеріледі:

— белгіленген тақырыпқа сәйкестігі;

— жаңалығы;

— техникалық сапасы;

— авторлық тұжырымдаманың тәуелсіздігі;

— ақпараттың дұрыстығы мен сенімділігі;

— белгіленген талаптарға сәйкестігі;

— журналистиканың этикалық принциптері.

V. Конкурстық комиссия

1. Байқау жеңімпаздары байқауға түскен жұмыстарды комиссия қарағаннан кейін анықталады.

2. Комиссия міндетті:

— барлық қатысушыларға бірдей жағдай жасауға;

— байқау нәтижелері туралы ақпараттың мерзімінен бұрын жариялануына жол бермеуге.

3. Комиссияның мүшесі байқауға қатысуға жіберілмейді.

4. Комиссия отырысқа қатысқан оның мүшелерінің көпшілік дауысымен тиісті шешім қабылдайды.

5. Комиссияның шешімі ашық дауыс беру арқылы қабылданады. Комиссия мүшелерінің дауыс беруі кезінде дауыс тең болған жағдайда, Комиссия төрағасының дауысы шешуші болып табылады.

VII. Қатысушылардың құқықтары, міндеттері және жауапкершілігі

1. Байқауға қатысушылар мыналарға құқылы:

— байқау шарттары мен тәртібі туралы ақпарат алуға;

— осы Ереженің тармақтарын түсіндіру үшін Комиссияға жүгінуге;

— байқауға қатысу үшін материал жіберуге.

2. Байқауға қатысушылар міндетті:

— байқау шарттарымен алдын ала танысуға;

— байқауға қатысу талаптарын зерделеуге;

— осы Ереженің талаптарына сәйкес дайындалған материалдарды уақтылы беруге;

— осы Ережеде көзделген ережелер мен рәсімдерді сақтауға.

3. Байқауға қатысушылар мынадай жағдайда байқауға қатысудан шеттетілуі мүмкін:

— материалдарда, сондай-ақ түйіндемелерде көрсетілген ақпараттың сенімділігіне қойылатын талаптарды бұзғаны үшін;

— осы Ережеде белгіленген шарттар мен рәсімдерді сақтамағаны үшін.

VIII. Марапаттау рәсімі

Жеңімпаздарды салтанатты марапаттау рәсімі 2025 жылғы 28 маусым – Бұқаралық ақпарат құралдары қызметкерлері күнінің қарсаңында Атырау қаласында өтеді.