Қамыстың астындағы қауіп
Біз бүгінде Атырау облысы аумағындағы резерватта орын алған қамыс өрттерімен біраз күрестік. Бұл — жай ғана жалын емес, астарында үлкен табиғи қатер жатқан күрделі құбылыс. Себебі өрт сөндірілген соң да қауіп толық сейілмейді. Қамыстың тамыры мен астындағы «қопа» деп аталатын ерекше табиғи қабат жерді ішінен қыздырып, қайта тұтану қаупін төндіреді.
Қопа дегеніміз — бірнеше жыл бойы өскен қамыстың шіріп, бірінің үстіне бірі үйіліп жиналуынан пайда болған қабат. Сыртынан қарағанда жасыл, тірі өсімдік сияқты көрінгенімен, астындағы құрылым мүлде басқа. Бұл қабаттың асты бос әрі ауамен толы болғандықтан, жоғары температура әсерінен бықсып жана береді. Кейде ол ұзақ уақыт бойы көзге көрінбестен шоқтанып жата береді де, кенеттен лап етіп тұтанып, үлкен өртке айналады.
Осы себепті біз мұндай қауіпті жерлерді тәулік бойы бақылауда ұстаймыз. Арнайы техникамен қопаның бетін қопсытып, топырағын аударып, ішкі ылғалды құрғатуға тырысамыз. Егер жер бедері ыңғайлы болса, жаяу жүріп, ал батпақты немесе күрделі жерлерде тракторға жер жыртатын соқа тіркеп жұмыс істейміз. Бұл оңай шаруа емес — қопаның ішкі температурасы өте жоғары, әрі аяқ астынан жер жарылып кетуі де мүмкін.
Өрт сөндіру тек жалынды өшірумен шектелмейді. Ол — ұзақ, мұқият, күн-түнге қарамай атқарылатын қауіпті жұмыс. Сондықтан әрбір тұрғыннан сұрарым — табиғатқа бейжай қарамаңыз! Қамыстың астында жасырынған қауіп бар. Бір сәттік абайсыздық үлкен апатқа ұласуы мүмкін.
Жантөре ДЕМЕШОВ,
облыстық төтенше жағдайлар департаменті
төтенше жағдайларды жою басқармасының бастығы,
азаматтық қорғау майоры
Сурет: atr.kz
