Атырауда «Синопек» компаниясының филиалы ашылады
Бүгін PetroCouncil делегациясы Шанхайдағы «Синопек» компаниясының басшылығымен маңызды кездесу өткізді. Бұл туралы PetroCouncil.kz ақпараттық ресурсы хабарлады.
Шанхайдағы кеңсе – әлемге танымал «Синопек» компаниялар тобындағы ең ірі бөлімшелердің бірі.
Кездесу барысында тараптар Атырау облысындағы полиэтилен, PET және PTA өндірісіне қатысты жобаларды қолдау мен ынтымақтастық мәселелерін талқылады. Атырау облысы әкімінің орынбасары Марат Мурзиев өңірдің инвестиция тарту бойынша Қазақстандағы негізгі аймақ екенін атап өтіп, полиэтилен сияқты ірі жобалардың аймақ пен ел экономикасының дамуына серпін беретінін айтты.
PetroCouncil мұнай-газ кеңесінің төрағасы Асылбек Жакиев жоба операторымен жергілікті қамтуды қолдау және жаңа мұнай-химия жобаларына мониторинг жүргізу мақсатында арнайы жұмыс тобы құрылып жатқанын мәлімдеді. Бұл жұмыс тобына Атырау облысы әкімдігі қолдау көрсетпек.
Шанхайдағы «Синопек» президенті өз кезегінде компанияның Атырау облысындағы негізгі жобаларға қолдау көрсетуге және ынтымақтастықты дамытуға мүдделі екенін жеткізді. Сондай-ақ, «Синопек» компаниясы Атырауда өз филиалын ашуға дайындалып жатқаны белгілі болды.
Кездесу қорытындысы бойынша тараптар полиэтилен жобасында жергілікті қамтуды дамыту,
қытайлық компанияларды тарту және тауарлар мен қызметтерді оқшаулау үшін бірлескен кәсіпорын құру, жобада кадрлық қолдау көрсету, оның ішінде 7 мыңнан астам жұмыс орнын қамтамасыз ету секілді келісімге келді.
Өз тілшіміз
