«Оқыту, тәрбиелеу, жақсы көру: Қазақстандағы Балалар жылы»
Елордада «Назарбаев Зияткерлік мектептері» дербес білім беру ұйымының «Оқыту, тәрбиелеу, жақсы көру: Қазақстандағы Балалар жылы» атты XIII Халықаралық ғылыми-тәжірибелік конференциясы өз мәресіне жетті.
Конференцияда 1500-ден астам қазақстандық мұғалімдер мен ғалымдар, сондай-ақ Финляндия, Ұлыбритания, Корея, Эстония, Ресей, Сингапур, Нидерланды, Жапония, АҚШ, Австралия, Португалия, Испания, Мальта және Болгария елдерінің белгілі педагогтері бас қосты.
Астанаға әлемдік білім беру саласының ең танымал өкілдері келді: Финляндиядағы Ювяскюль университеті тобының Educluster Finland инновациялар және сыртқы байланыстар жөніндегі директоры Дэвид Марш, Корей білім беруді дамыту институтының ғылыми қызметкері Сунг Джи Парк, Оксфорд университетінің Балаларды дамыту және оқыту профессоры Ирам Сираж (Ұлыбритания), Кембридж университетінің Емтихандық кеңесі өкілі Тим Оутс (Ұлыбритания), Жапониядағы Ұлттық білім беру саясатын зерттеу институтының аға ғылыми қызметкері Тошия Чичибу, Көптілді оқыту сарапшысы Питер Мехисто (Эстония).
Конференция делегаттарын Астана әкімі Алтай Көлгінов пен Оқу-ағарту вице-министрі Ғани Бейсембаев қарсы алды.
Конференцияның ауқымды күн тәртібі «Назарбаев Зияткерлік мектептері» ДББҰ Басқарма төрайымы Күләш Шәмшидинованың «Өзгермелі әлемде балаларды жан-жақты дамыту» атты баяндамасында айқындалды.
«Болашақ жолы: заманауи үрдістерді қабылдау» атты ең күрделі тақырыпты Финляндиядағы Ювяскюль университеті тобының Educluster Finland инновациялар және сыртқы байланыстар жөніндегі директоры, философия ғылымдарының докторы Дэвид Марш талдады. Ол халықаралық сарапшылар тобының құрамында Қазақстан мұғалімінің кәсіби стандартын жасауда NIS-пен серіктестікте жұмыс істеді.
Конференцияның жарқын сәттерінің бірі – Нидерландыдағы сараптама және сертификаттау зерттеу орталығының «Назарбаев Зияткерлік мектептері» дербес білім беру ұйымына конкурстық іріктеуді аккредиттеу туралы RCEC сертификатын табыстау рәсімі болды.
Сондай-ақ конференция аясында алғаш рет «Назарбаев Зияткерлік мектептері» ДББҰ Басқарма төрайымы Күләш Шәмшидинованың жас ата-аналармен кездесті.
Автограф-сессияда конференция қатысушылары қазіргі қазақ балалар әдебиетінің үздік шығармаларын тудырған белгілі отандық жазушылар мен суретшілер – Сауран Қастеев, Әсел Имайо, Алтай Асқар, Мейірхан Жылқыбай, Серікбол Хасан, Саят Қамшыгер, Рүстем Сауытбай, Ольга Гумирова, Зәуре Төреханмен кездесті.
Сондай-ақ қолтаңба сессиясында Назарбаев Университетінің Жоғары білім беру мектебі деканы Аида Сағынтаева бастаған авторлар тобының «Теория, әдістер және тәжірибелер» және Назарбаев Университетінің доценті Дуйшон Шаматовтың «Білімге құштарлық» кітаптары ұсынылды.
Екінші күні Күләш Шәмшидинова Конгресс-орталыққа тікелей Ақордадан келді. Оны айтулы жаңа наградамен бірінші болып конференция делегаттары құттықтады. Республика күні қарсаңында «Назарбаев Зияткерлік мектептері» дербес білім беру ұйымының Басқарма төрайымы Күләш Шәмшидиноваға «Қазақстанның еңбек сіңірген ұстазы» құрметті атағы беріліп, медальді Күләш Ноғатайқызына ел Президенті Қасым-Жомарт Тоқаев табыстады.
Аталмыш конференцияға Атыраудағы NIS директоры Ерали Бижанов бастаған осы ұжым мүшелері де қатысып қайтты. Анығында, мектеп директорының орынбасары Светлана Исмагулова, информатика және ағылшын пәндерінің эксперт-мұғалімдері Қазбек Азирбаев пен Альфия Бисенгалиевалар конференция барысындағы тың тақырыптарды арқау еткен түрлі жиыннан тек оң әсер алғандарын жеткізді.
– Конференция жоғары деңгейде өтті. Менің байқағаным – мұғалімдердің өз практикасын зерттеу мәдениеті дамыған. Қазіргідей цифрлық жаһандану заманында біздің ұстаздарымыз өзгерістерге ашық екенін көрдім. Заманның біздің алдымызға қойып жатқан өзекті мәселелерін еңсеруге мұғалімдер тез бейімделуде. Конференцияда өзекті, тың, тренд тақырыптар таңдалғаны – соның айғағы
Қазір өзгеріссіз қалу – қауіпті заман. Оған әрдайым дайын, ашық болу қажеттігін біздің ұстаздар толыққанды түсінеді. Әлбетте, халықаралық эксперттердің де тәжірибелері ұнады.
Жалпы білім жүйесінде революциялық өзгерістер үшін ғасырға жуық уақыт керек. Ал біз небары 10 жыл уақыт ішінде үлкен нәтижелер көрсетіп отырмыз. Яғни, NIS жүйесі аз ғана уақытта халықаралық деңгейге жетіп үлгергенін байқадым. Бұл басшылық ұстанған дұрыс саясаттың, оң бағыттың, ұстаздардың еңбексүйгіштігінің және кәсібилігінің арқасы деп білемін, – дейді Атыраудағы NIS директоры Ерали Бижанов.
