Атырауда «Ғалым мұрасы: Ғылым мен прогресс» тақырыбында Халықаралық конференция өтіп жатыр
UYEBAYEV UNIVERSITY-де көрнекті ғалым, техника ғылымдарының докторы, профессор, Қазақстан Ұлттық инженерлік академиясы мен Ресей Жаратылыстану ғылымдары академиясының академигі Сайранбек Ахметов еске алуға арналған халықаралық ғылыми-тәжірибелік конференция өз жұмысын бастады. Конференцияның пленарлық отырысында UYEBAYEV UNIVERSITY ректоры Гүлзада Шакуликова сөз сөйлеп, Сайранбек Мақсотұлының ғылым мен жоғары білім саласына қосқан үлесін ерекше атап өтті.
Х.Досмұхамедов атындағы Атырау университетінің ректоры Саламат Идрисов Сайранбек Мақсотұлының ғылыми қызметі мен зерттеулерінің еліміздегі инженерлік білім мен ғылымды дамытудағы рөлін жоғары бағалады. Сонымен қатар Қазақстан инновациялық және телекоммуникациялық жүйелер университетінің ректоры Әліби Баяхов, РФ Мәскеу мемлекеттік басқару университетінің доценті, техника ғылымдарының кандидаты Екатерина Шамаева, Уфа мемлекеттік мұнай техникалық университетінің профессоры Эльшад Теляшев, Әзербайжан ғалымы, техника ғылымдарының докторы Ракиз Саттаров, Әзербайжан мұнай және газ институтының профессоры Галиб Эфендиев, өзбекстандық ғалым Бахшилло Акрамовтар қатысып, Сайранбек Мақсотұлының ғылым жолындағы жаңашылдығы мен ізденістерінің жастарға үлгі мектебі екенін айтты.
Конференция аясында әлемнің түрлі елдерінен келген ғалымдар мен зерттеушілер өздерінің ғылыми жұмыстары мен тәжірибелерін бөлісіп, ғылым мен білім саласындағы жаңа жетістіктерді талқылады. Бұл іс-шара сондай-ақ, жастарды ғылымға қызықтыру және ғылыми байланыстарды нығайту мақсатында ұйымдастырылды.
Конференция аясындағы секциялық отырыстарда геология, бұрғылау, мұнай-газ кен орындарын игеру және тасымалдау бойынша жаңа зерттеулер ұсынылды.
Сайранбек Мақсотұлы – инженерлік ғылым мен жоғары білім беру саласына зор үлес қосқан тұлға. Конференция ғалымның еңбегін ұлықтап, қазіргі ғылым мен техниканың өзекті мәселелерін талқылау мақсатында ұйымдастырылды. Іс-шараға отандық ғалымдармен бірге Ресей, Әзербайжан, Өзбекстан елдерінің ғалымдары қатысуда.
