Жұлдыз-2-де жаңа мектеп ашылды

Атырау қаласындағы Жұлдыз-2 шағынауданында №48 жалпы орта білім беретін мектептің ашылу салтанаты өтті. Бұл білім ордасының Мемлекет басшысының тапсырмасымен қолға алынған «Келешек мектеп» ұлттық пилоттық жобасы аясында салынған.

Алғашқы құттықтау сөз кезегі Атырау облысының әкімі Серік Шәпкеновке берілді. Өңір басшысы жаңа білім ұясының өңірдің өркендеуіне қосар үлесі зор екенін атап өтті.

– Құрметті ағайын, ардақты ата-аналар, қадірлі ұстаздар!
Баршаңызды ең алдымен Қазақстан Республикасының басты мерекелерінің бірі — Ата Заңымыздың күнімен шын жүректен құттықтаймын. Тәуелсіздігіміздің, Конституциямыздың берік ұстанымдарының арқасында еліміз қарқынды дамып, әлеуметтік міндеттерді абыроймен орындап келеді.
Бүгінгі қуанышымыз — сол жетістіктердің айқын көрінісі. Конституция күнімен тұспа-тұс келіп отырған жаңа мектептің салтанатты ашылу рәсіміне қош келдіңіздер! Мемлекетіміз үшін ең басты байлық — жастар, ал жастарға сапалы білім мен қолайлы жағдай жасау — Президенттің күн тәртібіндегі негізгі міндеттердің бірі.

Өздеріңіз білесіздер, «Келешек мектеп» ұлттық жобасы аясында өңірімізде тоғыз жаңа мектептің құрылысы қолға алынған болатын. Былтыр оның үшеуі пайдалануға берілді, жыл соңына дейін тағы алтауы есігін ашады. Соның бірі — бүгін ашылып отырған осы заманауи білім ордасы. Мұнда оқушыларымыздың терең білім алып, жан-жақты дамуына барлық жағдай жасалған. Қажетті құрал-жабдықпен толық қамтылған, ұстаздар қауымы үшін де қолайлы орта қарастырылған.
Алғаш рет мектеп табалдырығын аттап отырған бүлдіршіндеріміз тарыдай болып кіріп, таудай болып шығып, елдің ертеңі, ата-ананың қуанышы, ұлттың мақтанышы болсын! Болашағымыз жарқын, еліміз еңселі болғай, — деді Серік Жамбылұлы.

Одан кейін білім саласының үздігі, ардагер ұстаз Сатқан Есенғалиев жүрекжарды лебізін білдірді.
– Бүгін сіздерді барша ардагерлер атынан жаңа мектептің салтанатты ашылуымен шын жүректен құттықтауға рұқсат етіңіздер. Соңғы жылдары облысымызда осындай еңселі, заманауи білім ордалары көптеп салынып келеді. Мұның барлығы, ең алдымен, келешек ұрпағымыздың сапалы білім алуына жасалған игі жағдай деп білемін.
Жаңа мектепті аралап көрдім. Шынымен де өте кең, жарық, талапқа сай ғимарат екен. Ең бастысы, ата-аналар мен ұстаздар үшін қауіпсіз орта қалыптастыруға ерекше көңіл бөлінген. Заманауи бейнебақылау жүйелері орнатылып, әрбір баланың қауіпсіздігі қамтамасыз етілген. Сонымен қатар ерекше білімді қажет ететін балалар үшін де толық жағдай жасалыпты.
Ұстаздар қауымы үшін де бар мүмкіндіктер қарастырылған. Олар жас ұрпаққа сапалы білім, саналы тәрбие беру жолында еңбектенуге қажетті барлық құрал-жабдықпен қамтамасыз етілген.
Осы орайда баршаңызды жаңа мектептің ашылуымен тағы да шын жүректен құттықтаймын! Балаларымыздың қадамы құтты болып, болашағы жарқын болсын, — деді Сатқан Ыбырайұлы.

Салтанатты шараның келесі бөлігі – символикалық кілт табыстау рәсімі болды. «TURAN ascent» ЖШС компаниясының директоры Еркінбек Әшімұлы мектеп директоры Орынгүл Қуандықоваға кілтті салтанатты түрде табыстады. Бұл сәт жаңа мектептің ресми түрде пайдалануға берілгенін айғақтады.

Мектептің тұсаукесер рәсімі де ұйымдастырылды. Оған білім саласының үздігі, ардагер ұстаз Сатқан Ибрайлұлы мен оқу ісінің үздігі, ардагер ұстаз Рулана Атласқызы қатысты. Лента қиылып, шашу шашылып, жиналған көпшілік қуанышты сәтке куә болды.

Ресми бөлімнен соң қонақтар жаңа мектеп ғимаратын аралады. Оларды Атырау қалалық білім бөлімінің басшысы Айнагүл Дүйсекенова қарсы алып, мектептің материалдық-техникалық базасымен және оқу-тәрбие процесімен таныстырды. Қонақтар жаңа сыныптарды, зертханаларды және заманауи жабдықталған кабинеттерді аралап көрді.

Аталған мектептің құрылысы былтыр басталған. Жобалық қуаты – 900 орын, алайда мектепте 1300 оқушы білім алмақ. Құрылыс құны – 6, 4 млрд теңгеден астам. Жалпы аумағы 10, 8 мың шаршы метрді құрайтын үш қабатты ғимаратта 52 сынып бар. Әр сыныпта 25 оқушыдан білім алады.

Мектептің меншік иесі – «Samruk-Kazyna Construction» АҚ, ал мердігер мекеме – «JM Capital» ЖШС.
Білім ошағы мектепке дейінгі, бастауыш, орта және жоғары білім беруді қамтитын толыққанды оқу мекемесі ретінде қызмет етеді.

Осылайша, Атыраудағы жаңа №48 мектеп заманауи үлгіде салынған, оқушыларға сапалы білім алуға барлық жағдай жасалған еңселі ғимарат ретінде есігін айқара ашты.

Алмас ҚАБДОЛ
суреттер автордікі