«Жас Отбасы» бағдарламасына қатысуға өтініш беру басталды
Atr.kz/2 шілде, 2020 жыл. 1 шілдеден бастап елімізде жас отбасыларға арналған тұрғын үй бағдарламасы іске қосылады.
«Жас отбасы» бағдарламасының шарттары бойынша, жаңадан отау құрған ерлі-зайыптылар бастапқы және қайталама нарықтан пәтер ала алады немесе жер учаскесін сатып алып, үй тұрғызуға мүмкіндіктері бар. Аталмыш бағдарлама шеңберінде қатысушыларға алты жылдан тоғыз жылға дейінге мерзімде несие беріледі.
— «Жас Отбасы» бағдарламасы бойынша алғашқы екі жылда жылдық несие мөлшерлемесі 6 пайызға тең, одан кейін ол 5 пайызға дейін төмендейді. Бағдарламаға қатысу үшін ерлі-зайыптылардың біреуі немесе екеуі де Тұрғын үй құрылыс жинақ банкінде «Жас отбасы» депозитін ашып, бір жыл ішінде болашақта сатып алатын пәтер бағасының 50 пайызын жинауы керек. Салым саларда, яғни депозитті ашар кезде, ерлі-зайыптының некеге тұрған мерзімі 3 жылдан аспауы тиіс. Ал, ерлі-зайыптылардың жасына және отбасындағы балалардың санына ешқандай шектеу жоқ, — деп түсіндірді «Қазақстанның тұрғын үй құрылыс жинақ банкі» АҚ Атырау облыстық филиалы.
Айта кетейік, мемлекеттік бағдарламаларды іске асыру аясында 2019-2020 жылдар аралығында «Қазақстанның тұрғын үй құрылыс жинақ банкі» АҚ Атырау облыстық филиалы арқылы 935 атыраулық ипотекалық несие алуға келісім алды.
«Атырау облыстық коммуникациялар қызметі»
