Ұлттық ұлан әскери қызметшілері «Таза Қазақстан» акциясын қолдады

Қазақстан Республикасы Ұлттық ұланы «Батыс» өңірлік қолбасшылығына қарасты барлық әскери бөлімдерде республикалық «Таза Қазақстан» акциясы аясында кең ауқымды экологиялық іс-шара — «Демалыс күнгі саябақ» өтті.

Іс-шара барысында әскери қызметшілер белсенділік танытып, әскери бөлім аумақтары мен саябақтарды қоқыстан тазартып, абаттандыру жұмыстарына қатысты. Олар жиектастарды, ағаштар мен орындықтарды, сондай-ақ шағын сәулет нысандарын сырлап, көркейту жұмыстарына үлес қосты. Әсіресе әскери бөлімдерге іргелес жатқан аумақтарды тазарту мен ретке келтіруге ерекше мән берілді. Бұл өз кезегінде жеке құрамның қызмет атқаруы мен демалысы үшін қолайлы жағдай жасауға ықпал етті.

Қолбасшылық өкілдерінің айтуынша, бұл бастаманың басты мақсаты — тек санитарлық жағдайды жақсарту ғана емес, сонымен қатар әскери қызметшілердің экологиялық мәдениетін қалыптастыру, қоршаған ортаға жанашырлықпен қарауға тәрбиелеу.

Мұндай игі істер әскери ұжымның ұйымшылдығын арттырып, тәртіп пен патриоттық рухты нығайтуға септігін тигізеді. «Батыс» өңірлік қолбасшылығы алдағы уақытта да экологиялық бастамаларды қолдап, елдің тазалығы мен игілігіне өз үлесін қоса бермек.

Қазақстан Республикасы Ұлттық ұланы «Батыс» өңірлік қолбасшылығының баспасөз қызметі