Үкімет әкімдермен бірлесіп, әрбір облыстың әлеуетін арттыруы тиіс – Президент

radmin news 2023 03 30 230330120023907e w860 h580 Жаңалықтар

Агломерацияларды дамыту мәселесіне баса назар аударған жөн. Бұл туралы Мәжілістің жалпы отырысында Мемлекет басшысы Қасым-Жомарт Тоқаев айтты, деп хабарлайды Ақорда.

«Аумақтық саясат жан-жақты ойластырылып жүргізілуге тиіс. Аймақтар қуатты болса, бүкіл мемлекет өсіп-өркендейді. Сондықтан еліміздің әкімшілік-аумақтық құрылымы оңтайлы әрі тиімді болуы керек. Бұл – өте маңызды мәселе. Былтыр жаңадан Абай, Ұлытау және Жетісу облыстары құрылғанын білесіздер. Бұл қадам осы аймақтарды тың қарқынмен дамытуға жол ашты. Біз аймақтар арасындағы экономикалық теңсіздікті азайту үшін тиімді шаралар қабылдауымыз керек», – деді Қасым-Жомарт Тоқаев.

Осы орайда Президент Үкімет әкімдермен бірлесіп, әрбір облыстың әлеуетін арттыруды тапсырды.

«Әр аймақтың өзіне тән мүмкіндігін толық пайдалану қажет. Мен мұны бірнеше рет айттым. Сондай-ақ агломерацияларды дамыту мәселесіне баса назар аударған жөн. Үкімет осыған қатысты заңның мүлтіксіз орындалуын және жоспарланған жұмыстың тиімді атқарылуын қамтамасыз етуге тиіс», – деді Мемлекет басшысы.

Баға берсеңіз
Атырау газеті
Пікір қалдырыңыз