Санат Асуат «Səs Azərbaycan» финалисі атанды

Бүгін Атырау халықаралық әуежайында жас талант Санат Асуат шет елдегі үлкен жобадан оралып, жерлестерінің қошеметіне бөленді. 

Ол Әзербайжанда өткен халықаралық вокалдық жоба – «Səs Azərbaycan» байқауында өнер көрсетіп, финалист атанды.

Байқау кезінде Санат көптеген елдің көрерменін тамсандырып, түрлі стильдегі әндерді жанды дауыста орындап, кәсіби әділқазылардың жоғары бағасына ие болған.

– Осындай ауқымды жобаның қатысушысы атану – мен үшін үлкен мәртебе. Бұл айлар маған шығармашылық шабыт, жаңа достар мен тың тәжірибе сыйлады. Мен өзіме сенім артқан барша жанға және отбасым мен ұстаздарыма алғыс айтамын, – дейді Санат Асуат.

Санат үшін ерекше әсер қалдырған орындауы – «Ізін көрем» әні.

– Бұл ән менің жүрегіме жақын. Сол орындау кезінде бар сезімімді жеткізуге тырыстым, – дейді ол.

Тоғжан ЕРМЕК

Суреттерді түсірген Әнуар ӘБІЛҒАЗИЕВ