Саяси сенім мен экономикалық ықпалдастық

ҚХР Төрағасы Си Цзиньпин мен Қазақстан Президенті Қасым-Жомарт Тоқаевтың кезекті жоғары деңгейдегі кездесуі — екіжақты стратегиялық әріптестіктің айқын көрінісі. Араға небәрі екі ай салып, тағы да тікелей диалог орнауы – қытай-қазақ қатынастарының қарқындылығы мен сенімді сипатын көрсетеді.

Си Цзиньпиннің айтқанындай, Қытай мен Қазақстан – бір-біріне сенім арта алатын, көпжақты және тұрақты серіктестер. Бұл сенім тек саяси декларация деңгейінде ғана емес, нақты жобалар мен өзара тиімді келісімдер арқылы дәлелденіп келеді. Әсіресе, сауда-экономикалық байланыстар, көлік-логистика, энергетика және ауыл шаруашылығы салаларындағы ынтымақтастық – екі елдің экономикалық мүдделерінің сабақтастығын көрсетеді.

Қытай тарапының қазақстандық басшыны ШЫҰ саммитіне және Екінші дүниежүзілік соғыстағы Жеңістің 80 жылдығына арналған салтанатты іс-шараларға шақыруы — Қазақстанның халықаралық беделінің, бейтарап әрі көпвекторлы саясатының мойындалуының бір дәлелі.

Сондай-ақ Қытай – Орталық Азия саммиті шеңберінде қабылданған құжаттар мен жаңа стратегиялық уағдаластықтар аймақ елдерінің Қытаймен өзара іс-қимылға бейілділігін нығайта түсті. Бұл ынтымақтастықтың басты бағыты — тек экономикалық пайда табу емес, сонымен қатар ұзақ мерзімді тұрақтылық пен қауіпсіздікті қамтамасыз ету.

Бүгінде жаһандық геосаяси ахуалдың құбылып тұрған тұсында, Қазақстан мен Қытай арасындағы сенімді диалог пен өзара қолдау — аймақтық тұрақтылықтың кепіліне айналып отыр. Сондықтан қытай-қазақ қатынастарының жаңа деңгейге көтерілуі — уақыт талабы әрі екі ел үшін де стратегиялық маңызы бар бағыт.

Саламат ИДРИСОВ,

Х.Досмұхамедов атындағы Атырау университетінің ректоры, Атырау облыстық мәслихатының депутаты