Республикалық «CAD skills» жолдастық чемпионаты басталды
Атырауда “Жұмысшы мамандықтар жылы” аясында алғаш рет “Инженерлік графика CAD” құзыреттілігі бойынша республикалық “CAD skills” чемпионаты өтуде, — деп хабарлайды Өңірлік коммуникациялар қызметі.
Сайыс барысында қатысушыларға нақты өндірістік тапсырмалар ұсынылып, оларды орындау арқылы өздерінің практикалық дағдыларын жетілдіреді. Бұл үдеріс жас мамандар үшін болашақ кәсіби жолындағы бағалы тәжірибе болмақ.
— Чемпионатқа қатысушылар 11 облыстан жиналды. Іс-шараның басты мақсаты — WorldSkills қозғалысын дамыту, оны жастар арасында кеңінен насихаттау және оларды алдағы «Turkish Skills» чемпионатына дайындау. Барлық қатысушыға сәттілік тілеймін, — деді «Talap» КЕАҚ кеңесшісі Әсима Бимендина.
Сайыс 2-5 маусым аралығына ұйымдастырылған. Қатысушылар 3D модельдеу арқылы механикалық құрастыру, механикалық конструкциялау және физикалық объектіні кері модельдеу бағыттары бойынша өзара бақ сынайды.
