Республикалық экспедиция өкілдері – Атырауда
Облыстық тарихи-өлкетану музейінде жалпыұлттық жоба аясында Қазақстан Жазушылар одағы республикалық қоғамдық бірлестігінің ұйымдастыруымен рухани мұраны жаңғырту, насихаттау мақсатында «дөңгелек үстел» өтті. Онда қазақ этнографиясы және жазушы, этнограф Зейнолла Сәніктің этнографияық еңбегі таныстырылды. Шараға «Ұлттық құндылық. Зейнолла Сәнік – 90 жыл» атты республикалық экспедиция мүшелері, өңір ғалымдары қатысты.
Президент Қасым-Жомарт Тоқаев Ұлттық құрылтайдың IV отырысында тарихи зерттеулерді жандандыру мәселесін алға қойған болатын. Мемлекет басшысы төл болмысымыз бен мәдени мұрамызды дәріптеудің маңыздылығын атап өтіп, осы бағыттағы ғылыми ізденістерді күшейту қажеттігін алға тартты. Осы міндет негізінде
Зейнолла Сәнік атындағы мәдениет қорының демеушілігімен ұйымдастырылған экспедиция құрамында белгілі этнограф, мәдениеттанушы ғалымдар мен қаламгерлар – ақын Қасымхан Бегманов, қоғам қайраткері Әміржан Қосанов, Зейнолла Сәнік атындағы мәдениет қорының құрылтайшысы Қанат Зейноллаұлы және атқарушы директоры Серік Қалиевтар бар.
Шара барысынан білгеніміздей, ұлттық құндылықтарды насихаттайтын республикалық экспедиция Маңғыстау өңірінен бастау алған екен.
Алдымен мәдениет және тілдерді дамыту басқармасының басшысы Әбіл Жоламанов бүгінгі шараның маңызына тоқталды. Ал, Ақын Қасымхан Бегмановтың айтуынша, жобаның мақсаты – өңірлердегі тарихи орындардың жағдайымен танысу, ұлттық құндылықтарды жан-жақты дәріптеу, олардың сақталуын зерделеу, жергілікті этнографтар мен өлкетанушыларды жаңа еңбектерін жинап, жарыққа шығару, батыс өңірдегі жоғары оқу орындарының студенттеріне көрнекті ақын Е.Раушанов атындағы стипендия тағайындап, тапсыру.
«Дөңгелек үстел» кезінде бір топ шығармашылық өкіліне Қазақстан Жазушылар одағына қабылданғаны жөнінде куәлік пен төсбелгі табысталды.
Тарих ғылымдарының докторы, профессор Ахмет Тоқтабай айтып өткеніндей, Зейнолла Сәніктің этнографиялық еңбегі жоғары оқу орындары мен білім беру ұйымдары үшін маңызы зор. Айтуынша, бұл кітапта ғұн дәуірінен басталып, қазақ халқының ру-тайпалық бөлінісі, мал және егін шаруашылығы, зергерлік өнері, киіз үй бұйымдары, рухани мәдениеті жан-жақты көрініс тапқан.
Рита ӨТЕУҒАЛИ
