Қауіпті індет Солтүстік Қазақстан мен Жамбыл облыстарында да тіркелді

Atr.kz/25 наурыз, 2020 жыл. СҚО мен Жамбыл облысында бір адамнан коронавирус жұқтырғандар тіркелді.

«Осы сағатта Нұр-Сұлтан қаласы бойынша 36 адам, Алматы қаласында – 29 адам, Қарағанды қаласында — 2, Алматы облысында — 1 адам, Ақтөбе облысында — 1 адам, Шымкент қаласында – 1 адам, Жамбыл облысында -1 адам, Солтүстік Қазақстан облысында — 1 адам жалпы 72 науқас тіркелді», делінген хабарламада.

Айта кетейік, Шымкентте тіркелген науқас Нұр-Сұлтан қаласынан келгені белгілі болды. Бұл туралы «Хабар 24» телеарнасының тікелей эфирінен Шымкент қалалық тауарлар мен көрсетілетін қызметтердің сапасын және қауіпсіздігін бақылау басқармасының басшысы Әбдіманап Төлебаев айтты.

«Шымкент қаласында 1 коронавирус жағдайы тіркеліп отыр. Қазіргі уақытта ол Шымкент қаласының жұқпалы аурулар ауруханасына оқшауланып, ем-дом қабылдап жатыр. Ол азамат 20 наурыз күні Нұр-Сұлтан қаласынан келген. Онымен қарым-қатынаста болған адамдардың барлығы іздестіріліп, табылды. Ол адамдармен толыққанды індетке қарсы шаралар жүргізіліп жатыр», — деді ол.

***

Сонымен, 24 наурызда кешкі сағат 21:40-тан бастап елімізде коронавирус жұқтырған 4 адам тіркелді. Шымкентте алғашқы оқиға тіркелді. 1996 жылғы азамат инфекциялық стационарда жатыр. Ер адам Шымкентке Нұр-Сұлтан қаласынан келген. Қазіргі уақытта ол Шымкент қаласының жұқпалы аурулар ауруханасына оқшауланып, ем-дом қабылдап жатыр. Оның жағдайы бірқалыпты. Онымен байланыста болғандардың барлығы анықталған. Қазір олар оқшаулануға алынуда. Коронавирус инфекциясының алдын алу үшін Шымкент қаласының жедел штаб мүшелері барлық санитарлық-эпидемиологиялық шараларды жүзеге асыруда. Сонымен қатар, штаб шешімімен барлық бағынысты ведомство органдары қаладағы эпидемиологиялық жағдайды айрықша бақылауға алды.

Екінші жағдай Нұр-Сұлтан қаласында тіркелді. 1938 жылғы ер адам стационарда жатыр.

Үшінші оқиға Жамбыл облысында тіркелді. Бұл 1979 жылғы азамат. Ол Қырғызстаннан келген. Стационарға жатқызылған.

Коронавирус инфекциясына қатысты төртінші жағдай Солтүстік Қазақстан облысында тіркелген. Ол 1993 жылғы азаматша Ресей Федерациясынан келген. Ол провизорлық стационарда дәрігерлердің бақылауына алынды. Онымен байланысты болғандардың барлығы анықталды және стационарлық карантинге оқшауланды.

Осылайша елімізде жалпы 72 жағдай тіркелді. Нұр-Сұлтан қаласы бойынша 36 адам, Алматы қаласында – 29 адам, Қарағанды қаласында — 2, Алматы облысында — 1 адам, Ақтөбе облысында — 1 адам, Шымкент қаласында – 1 адам, Жамбыл облысында -1 адам, Солтүстік Қазақстан облысында — 1 адам.

«Atr-Ақпарат»