Қанат Бозымбаев: Атыраулықтар тасқынға қарсы күресте бірлік танытты

Еліміздің Премьер-министрінің орынбасары Қанат Бозымбаев Tengrinews.kz-ке берген сұхбатында Атырау облысының тұрғындарының тасқынға қарсы тұрудағы бірлігін жоғары бағалады.

Қанат Бозымбаевтың айтуынша, Атырау облысы су тасқынына қарсы ерекше шараларды қолға алып, тиімді әрекет ете білген. “Жайық өзені бойында су тасқынынан бірде-бір тұрғын үй зардап шеккен жоқ”, – деді ол.

Атырау қаласының аумағынан Каспийге 7,5 миллиард текше метр су өткеніне қарамастан, өндірістік нысандар мен тұрғын үйлерді қорғау шаралары сәтті ұйымдастырылды. Егер Жайық өзенінің деңгейі көтеріліп, су Атырауға кірсе, Атырау мұнай өңдеу зауыты мен басқа да өндіріс орындары үлкен шығынға ұшырауы мүмкін еді. Бұл ел экономикасына ондаған миллиард доллар шығын әкелген болар еді.

Премьер-министр тапсырмасымен оқиға орнына жіберілген Қанат Бозымбаев Атырау облысының тұрғындарының ұйымшылдығына ризашылығын білдірді. Индер және Махамбет аудандарының тұрғындары, тіпті ақсақалдар мен балалар да бөгеттерді нығайтуға белсене атсалысқан. Алғашқы күндері халық өз бетімен әрекет етіп, мемлекеттік көмектің болмауынан алаңдаса да, кейін Қорғаныс министрлігі, Ішкі істер министрлігі мен төтенше жағдайлар қызметі тарапынан қолдау көрсетіліп, көптеген техника мен мамандар жіберілді. Су тасқынының алдын алу үшін Атырауда 30 мыңнан астам адам және 4000-ға жуық техника жұмылдырылып, 500 шақырымға жуық бөгет салынды.

“500 шақырым бөгет деген Астанадан Петропавлға дейінгі аралықты қамтиды”, – деді Қанат Бозымбаев.

Сонымен қатар, Бозымбаев кейбір кемшіліктердің болғанын да атап өтті. Әсіресе, Құлсары қаласында дұрыс болжам жасалмағандықтан, 2700-ге жуық үй зардап шекті. Жем өзенінің бойында гидробекеттердің жоқтығынан “Қазгидрометтің” болжам жүйесінің толық дамымауы жағдайды қиындатқан. Дегенмен, Құлсары тұрғындары барынша белсенділік танытып, қолда бар техника мен қол күшімен көптеген бөгеттерді салып үлгерген.

Қанат Бозымбаев Атырау облысы су тасқынының алдын алу шараларын жақсы ұйымдастырып, қиындыққа қарсы тұруда бірлік пен белсенділік танытқанын ерекше атап өтті.

Сұхбаттың толық нұсқасын төмендегі сілтемеден оқи аласыздар.

https://tengrinews.kz/article/pavodki-i-rabota-na-rezultat-intervyu-s-kanatom-bozumbaevyim-2604

Алтыншаш ҚҰРМАШЕВА