![Қанат Бозымбаев Атырау облысындағы төтенше жағдайды қалай реттейді? 1 9bac570d 26ca 47ed a827 2d670ef9be59](https://atr.kz/wp-content/uploads/2024/04/9bac570d-26ca-47ed-a827-2d670ef9be59.jpeg)
Қанат Бозымбаев Атырау облысындағы төтенше жағдайды қалай реттейді?
Мемлекет басшысының тапсырмасы бойынша Су тасқынына қарсы іс-шараларды үйлестіру және су тасқыны кезеңінің салдарын жою жөніндегі республикалық штаб жетекшісінің орынбасары Қанат Бозымбаев қазір – Атырау облысында. Өңірдегі дайындық режимі – жоғары деңгейде, төтенше жағдайды жою жөніндегі облыстық жедел штаб жұмыс істеп жатыр.
![Қанат Бозымбаев Атырау облысындағы төтенше жағдайды қалай реттейді? 2 366dc39a 4cda 43d9 a253 d1b6066c8b9f](https://atr.kz/wp-content/uploads/2024/04/366dc39a-4cda-43d9-a253-d1b6066c8b9f-1024x576.jpeg)
Облыс әкімдігінің ресми парақшасында хабарланғандай, вице-премьер Ақтөбе облысымен шекара аумағын тікұшақпен айналып өтті. Жем өзеніндегі зақымдалған бөгеттің жағдайына баға берді. Кеше оның бұзылуы нәтижесінде Құлсары қаласының екінші және үшінші учаскелері, сондай-ақ «Жадырасын-2», «Болашақ», «Вахталық кент» шағынаудандары, «Қарағай» елді мекені су астында қалды.
6 сәуірдегі жғдай бойынша Атырау облысының үш ауданында күрделі су тасқыны жағдайы сақталуда, 2 елді мекенге көлікпен қатынау мүмкін емес.
![Қанат Бозымбаев Атырау облысындағы төтенше жағдайды қалай реттейді? 3 d9aeda91 270d 4576 942f 43052a1d26d0](https://atr.kz/wp-content/uploads/2024/04/d9aeda91-270d-4576-942f-43052a1d26d0-1024x576.jpeg)
Құлсары қаласында 2,6 мың жеке тұрғын үй мен әкімшілік ғимарат су астында қалып, 5 сәуірден бастап қауіпті аймақтан 15 632 адам шығарылды. Халықты эвакуациялау жалғасуда.
Қазір жағалауды нығайту жұмыстары қарқынды жүріп жатыр, топырақ толтырылған 45,9 мың қапшық, 174,3 мың тонна инертті материал төселді. 5 сәуірде Каспий теңізіне қарай өткізу қабілетін арттыру үшін Жем өзенінде мұз жару жұмыстары жүргізілді, тағы бір рет мұз жару жоспарланған.
Әкімдік пен күштік құрылымдардың 600-ге жуық қызметкері, 148 техника, 2 жүзу құралы және 500 ерікті жұмылдырылды.
5 елді мекенде – Миялы, Жангелдин, Көздіқара ауылдық округтері, Аққора, Жасқайрат ауылдарында қауіп-қатер сейілді.