Ойын-сауық кешенінде не болып жатыр?
Атырау қаласындағы «Атырау» сауда-ойын-сауық кешенінде өрт-тактикалық жаттығу өтті. Шараның басты мақсаты – өрт сөндіру бөлімдерінің балалар ойын алаңында орын алған өртті сөндіру кезіндегі жауынгерлік дайындығын пысықтау, келушілерді қауіпсіз көшіруді ұйымдастыру, сауда орындары мен ойын-сауық кешендерінің тактикалық жағдайы және конструкциялық ерекшеліктерімен танысу.
Шартты түрде балалар ойын-сауық орталығында кенеттен қою қара түтін шығып, көршілес бөлмелерге таралу қаупі туындады. Қалалық өрт сөндіру бөлімдері дереу оқиға орнына жетіп, келушілер мен кәсіпкерлерді эвакуациялау жұмыстарын жүргізді. Өрт сөндірушілердің жедел әрекетінің нәтижесінде тілсіз жау қысқа уақытта ауыздықталып, адамдар түгелдей қауіпсіз жерге көшірілді. Өрт-тактикалық жаттығуға жалпы саны 8 бірлік техника мен жеке құрамнан 40 адам қатыстырылды.
Жаттығу соңында талдау жасалып, барлық қатысушылар нысанның тактикалық жағдайы мен ерекшеліктеріне қанықты. Сонымен қатар, қалалық төтенше жағдайлар басқармасының қызметкерлері келушілер мен кәсіпкерлерге өрт қауіпсіздігі талаптарын түсіндіріп, оқиға орын алған кездегі дұрыс іс-қимыл тәсілдері мен алғашқы өрт сөндіру құралдарын пайдалану жолдарын көрсетті.
Дәулетқали АРУЕВ
Суреттерді түсірген Ерлан АЛТЫБАЕВ
