Өнерпаз тәртіп сақшылары марапатталды

Атырауда полицейлер арасында ішкі істер органдарындағы мәдени-шығармашылық әлеуетті сақтау, көркем өнерпаздықты дамыту және жеке құрамның бойында рухани-адамгершілік құндылықтарды қалыптастыру мақсатында «Міндет, абырой, ерлік» атты облыстық вокалдық байқау-фестивалі өтті.

Ауқымды іс-шараға департамент қызметкерлері мен қалалық полиция басқармасы, аудандық бөліністерден жиналған 13 көркемөнерпаз қатысты. Байқау шартына сәйкес жеребе бойынша қатысушылардың реттік нөмірі анықталып, әрбір қатысушы ұлтжандылыққа толы патриоттық рухты оятатын әндерді шырқады.

Бақ сынасқан полицейлер арасынан топты жарып Атырау қалалық полиция басқармасының қызметкерлерінен құралған Квинтет I орынды жеңіп алды. II орынды Исатай ауданы полиция бөлімі жергілікті полиция қызметі бөлімшесінің учаскелік полиция инспекторы, полиция аға лейтенанты Рима Қарағойшиева жеңіп алса, III орын Атырау облысы полиция департаменті жанындағы патрульдік полиция ротасы кезекші бөлімінің көмекшісі, полиция сержанты Сейілхан Қайруллин қанжығасына байлады.
Айта өту керек, байқау жеңімпаздары 21-23 қазан аралығында Астана қаласында өтетін республикалық фестивальға жолдама алды.

Майра ЕРҒАЛИ