Облыс әкімі Қайыршақты тұрғындарымен кездесті (+ФОТО)
Томарлы ауылдық мәдениет үйіндегі кездесуде Қайыршақты ауылдық округінің әкімі Шапхат Қалиев шешімін күткен бірқатар мәселелерге ерекше тоқталды.
Атап айтқанда, округте спорт кешенін, Жұлдыз-3, Көктем ықшамаудандарында мектеп, балабақша салу, автокөлік және жаяу жүргіншілер жолын төсеу, Томарлы, Талғайраң, Бесікті, Аспа және Стандарт учаскелерінде ескі электр желілері мен бағаналарын ауыстыру, Дамбы өнер мектебінің Қайыршақты филиалын ашу, округ аумағындағы Соколок каналын күрделі жөндеу – кезек күттірмейтін іс-шаралар.
Бұл кездесудің бұрынғылардан ерекшелігі, ол әлеуметтік желіде тікелей эфир арқылы көрсетілді. Сонымен қатар, тұрғындардың облыс әкіміне қоятын сұрақтары мен ұсыныс-пікірлерін жинақтау үшін әкім аппараты мен ауылдық клуб ғимараттарында арнайы жәшіктер орнатылған болатын. Округ әкімдері айтылған ұсыныстардың бәрін көпшіліктің алдында жария етіп, нақты жауаптарын берді.
Амандық САҒЫНТАЙҰЛЫ
Фото: Ерлан АЛТЫБАЕВ
