Облыс әкімі 20 миллионыншы тұрғын дүниеге келген отбасыны құттықтады
Еліміздің 20 миллионыншы тұрғыны Атырау қаласында өмірге келді, деп хабарлайды atr.kz тілшісі.
Жұмағазиевтер отбасының тұңғыш сәбиінің есімі — Мұхаммад. Бүгін облыс әкімі Серік Шәпкенов қалалық перзентханаға барып, ақжолтай жаңалықпен құттықтап, сәбидің туу туралы куәлігін ата-анасына табыс етті.
— Алты алаш үшін ақ түйенің қарны жарылған бұл күннің астарында мемлекеттің жаңа экономикалық, инфрақұрылымдық сын-қатерлерді еңсере алуы мен жаңа ұрпақтың дамуы үшін қолайлы жағдай жасауы жатқанында еш дау жоқ. Мемлекеттік отбасылық саясаттың басты мақсаты – өмірдің барлық сынағына тойтарыс бере алатын ұрпақ тәрбиелеу. Міне, бүгін Қазақстан халқы 20 миллион адамға жетті. Бұл сүйіншілететін ақжолтай хабар! «Құбылған әлем жарысы – ақылды жанның табысы» деп Шәкәрім бабамыз айтқандай, бұл қуаныш – еліміздің көкжиектен көрінген қандай да бір дауылдың қуатын, екпінін еңсеріп, болашаққа нық қадам басуының белгісі,-деді С.Шәпкенов.
Шарада «Отбасы банк» АҚ облыстық филиал басшысы Нұржан Мұғалімов Жұмағазиевтер отбасына 2 млн. теңгелік сертификат табыс етті. Бұл сомманы баланың болашақтағы қажеттіліктері үшін банк депозитіне салып, Мұхаммадтың оқуына немесе баспана алуына пайдаланады.
Мұхаммад Қосай 14 қарашада дүниеге келді. Бойы — 54 см, салмағы — 3 660 грамм. Әкесі Берік Жұмағазиев, анасы Айдана Оразымбетова. Тарихи сәтте қуанышын жасыра алмаған әкесі Берік Жұмағазиев көрсетілген құрмет үшін ризашылығын білдірді.
— Таңертең әлеуметтік желіде еліміздің 20 миллионыншы азаматы өмірге келді деген жаңалықты оқыдым. Іштей менің де ұлым осылардың қатарында ғой деп ойладым. Кейін дәл сол сәтте жұбайым хабарласып, қуанышты жаңалықпен бөлісті. Біздің төрт жылдан бері аңсап күткен сәбиіміз өзінің несібесін елінің берекесімен бірге әкелді. Болашақта Отанын сүйген, еліне, ұлтына, дініне адал қызмет етер перзенттен болса екен деген тілегім бар,-деді Берік Жұмағазиев.
Жалпы Атырау облысында жыл басынан бері 14 мыңға жуық сәби дүниеге келді.
