Мұнайшылар неге дүрлікті?
Осы апта Теңіз кенішіндегі еңбек құқығына қатысты дау-дамаймен басталды. Жылыой ауданының әкіміне және басқа да мүдделі тұлғалардың назарына ұсынылған әлеуметтік желідегі бейнеүндеуде «Cis Kashagan» мұнай-сервистік компаниясының жұмысшы-қызметкерлері өздерінің наразылықтарын білдірген.
«Біз «Cis Kashagan» жұмысшылары Теңіз кен орнында 2023 жылдан бері жұмыс жасаймыз, әрқайсысы өз ісінің маманы. Енді «ТШО-мен келісім-шарт аяқталды» деп, бізді 1 сәуірден бастап «Карат» ЖШС-не ауыстырылады деді. Осыған дейін «Cis Kashagan» компаниясы жалақының инфляция деңгейіне сәйкес 8,6%-ға өсетінін айтты. Енді біздің талабымыз – компания 3 айдың еңбекақысының айырмасын төлесін, «Карат» ЖШС-не ауысатын қызметкерлерге сынақ мерзімін енгізбесін және «Cis Kashagan» компаниясында өскен еңбекақы көлемі сақталсын» деген еңбеккерлер өздерінің талап-арыздарын жеткізді.
Жұмысшылардың талаптары ескеріліп, олардың еңбек құқықтары қорғала ма? Бұл сұрақты Атырау облысы бойынша мемлекеттік еңбек инспекциясы департаменті басшысының орынбасары Кемел Иманғалиевке қойған едік. Ол қазіргі таңда тараптар арасында келіссөздер жүргізіліп, мәселенің шешімін тауып жатқанын атап өтті.
– «Теңізшевройл» ЖШС-і мен «Cis Kashagan» компаниясы арасындағы келісім-шарт 31 наурызда аяқталған. Ал жаңа келісім-шарт бойынша ТШО компаниясы мен «Карат» ЖШС-і 1 сәуірден бастап бірлескен жұмыстарын бастады. Наразылық білдірген «Cis Kashagan» компаниясының жұмысшы-қызметкерлері жұмыссыз қалмайды, барлығы келісімдері бойынша «Карат» ЖШС-не ауыстырылады. Сондай-ақ бұрынғы «Cis Kashagan» компаниясында инфляция деңгейіне сәйкес 8,6%-ға өсірілген жалақының индексацияланған айырмасы (3 айға) жұмысшылармен есеп-айырысу (расчетный) барысында төленеді. Жұмысшылардың екінші және үшінші талаптары бойынша айтарым, бұл жұмыс берушінің құқығындағы мәселе. «Cis Kashagan» компаниясының 500-дей жұмысшысымен түсіндіру жұмысы жүргізілді. Қазір вахтада жүрген 200-ден аса адам келісімдерімен «Карат» ЖШС-мен еңбек шартына қол қойды. Ал қалған жұмысшыларға кезекті вахта барысында түсіндірілетін болады,- деген басшының орынбасары тараптардың ортақ мәмілеге келгенін түсіндірді.
Инспекция басшылығының айтуынша, бұл мәселе 4 наурызда облыс әкімінің төрағалығымен өткен Әлеуметтік әріптестік пен әлеуметтік-еңбек қатынастарын реттеу жөніндегі облыстық комиссияның кезекті отырысында талқыланған. Жиында ТШО, «Cis Kashagan», «Карат» компанияларының басшыларына жұмысшы-қызметкерлердің еңбек құқықтары мен мүдделерін заң шеңберінде қорғау, жұмыстан босаған адамдарды жұмыссыз қалдырмау тапсырылды. Сондай-ақ осы басқосуда бір мекемеден екінші мекемеге жұмыс көлемін беру кезінде қызметкерлерді толығымен ауыстыру мәселесі де айтылды.
Майра ЕРҒАЛИ
