Мемлекет басшысы ҚР Президентін ұлықтау рәсімінде алдағы 7 жылды бүгінгі буынның және келешек ұрпақтың алдындағы борышымды өтеуге күш салатынын мәлім етті, деп хабарлайды ҚазАқпарат тілшісі.
«Шын мәнінде, ел сенімін еш нәрсемен өлшеу мүмкін емес. Халықтың сенімі – ең құнды нәрсе. Сайлау нәтижесін халқымыздың саяси бағдарыма – бағасы, алдағы жоспарыма – батасы деп қабылдаймын. Халқының қолдауына ие болып, ел тізгінін ұстау – ер азамат үшін ең биік мәртебе әрі орасан зор жауапкершілік», – деді Президент.
Қасым-Жомарт Тоқаев халықтың сенімін өзіне берілген аманат деп қабылдайтынын атап өтті.
«Алдағы 7 жылды бүгінгі буынның және келешек ұрпақтың алдындағы борышымды өтеуге берілген бірегей мүмкіндік деп білемін. Қазақта «аманат» деген асыл ұғым бар. Халқымның сенімі – маған аманат. Осы аманатқа адал болу – мен үшін қасиетті парыз. Ел үмітін ақтап, Қазақстанды өркендеген, бақуатты мемлекетке айналдыру үшін қолымнан келгеннің бәрін жасаймын», – деді Мемлекет басшысы.
Фото: сурет ашық дереккөзден
