Мақатта Жастар саябағы салынады
Мақат ауданының тұрғындары мен қонақтарына қолайлы жағдай жасау мақсатында биыл бірнеше маңызды жоба іске асырылады. Солардың бірі – Бәйгетөбе ауылында бой көтеретін Жастар саябағы.
Аудан әкімдігі баспасөз қызметінің хабарлауынша, жалпы аумағы 2040 шаршы метрді құрайтын бұл нысан заманауи талаптарға сай салынады. Саябақта жаяу жүргіншілер жолы, демалыс орындықтары және жарық шамдары қарастырылған. Сондай-ақ жаңбыр мен еріген қардың суы жаяу жүргіншілер жолында жиналып қалмауы үшін арнайы су ағатын жерлер жасақталады.
Саябақ аумағына 152 ағаш отырғызылып, көгалдандыру жұмыстары жүргізілмек. Бұл жасыл аймақ жастардың игілігі үшін ғана емес, сонымен қатар ауданның көркін аша түсетін маңызды нысанға айналады деп күтілуде.
Алтыншаш НӘСІПҚАЛИҚЫЗЫ
