Мал іздеуге шыққан Индер тұрғыны із-түзсіз жоғалып кетті
23.01.2019 21:17 сағат
Индер ауданының тұрғыны із-түзсіз жоғалып кетті. Атырау облысы Төтенше жағдайлар департаментінің хабарлауынша, оқиға 22 қаңтар күні түскі мезгілде тіркелген. 1957 жылы туылған азамат Жарсуат ауылынан 60 шақырым қашықтықта орналасқан «Қуат» участогінен сағат 14:00 шамасында шығып кетеді. Жоғалған малын іздеп шыққан азамат «Уаз» автокөлігін тізгіндеген.
«Тұрғынның із-түзсіз жоғалғандығы туралы шағым бастапқыда Жарсуат ауылының әкіміне түскен. Қазіргі таңда азаматты іздестіру жұмыстарына Жарсуат ауылдық округі әкімдігінен 2 бірлік МТЗ-80 тракторы және 2 нива бөлінді. 11 адам іздестіру жұмыстарына қатысуда. Іздестіру шаралары жалғасып жатыр» делінген Атырау облысы Төтенше жағдайлар департаменті таратқан хабарламада.
Баян ЖАНҰЗАҚОВА.
Фото — pulse19.ru
