Мақаттық спортшылар V Азия ойындарынан жүлдемен оралды (ФОТО)
Мақат ауданының спортшылары V Азия ойындарынан жүлдемен оралды. Олар Ашхабадта өткен байрақты бәсекеде муай-тай спортынан 2 күміс медальді қоржынға салды.
19-27 қыркүйек аралығында Түрікменстанның астанасы Ашхабад қаласында жекпе — жек спорт түрлерінен V Азия ойындары өткен болатын. Дүбірлі додаға Қазақстан намысын 16 спорт түрі бойынша 181 спортшы қорғаған-ды.
Осы жарыста жергілікті спортшылар Еламан Саясатов пен Әбіл Галиев күміс жүлдені қанжығаларына байлады. Біріншілікте Еламан алғашқы жекпе-жегін Филиппин спортшысына, ал Әбіл Қырғызстан спортшысына қарсы өткізіп, жеңіске жетіп, финалға жолдама алған еді. Алайда олар ақтық сында тай елінің спортшыларына есе жіберіп алды.
Дегенмен, жас спортшылардың талабы таудай, жігері мықты. Әлі талай бәсекелерде тұғырдың төрінен көрінетініне сенім білдіреміз.
Мөлдір ІЗТҰРҒАНОВА
