ҚАЛАМГЕРЛЕРГЕ – ҚҰРМЕТ
«Атырау» газеті редакциясының шығармашылық ұжымында жарты ғасыр өмірін өткізген Бағзай Супьянқызына облыс әкімінің орынбасары Шыңғыс Мұқанның атынан Алғыс хат және «Атырау-Ақпарат» ЖШС атынан Құрмет грамотасы табыс етіліп, иығына ата дәстүрмен камзол жауып, гүл шоқтары ұсынылып, сый-сияпат көрсетілді.
Хамит Әубәкіровке де облыс әкімінің міндетін атқарушы Ғұмар Дүйсембаевтың және облыстық мәслихаттың Алғыс хаттары табысталды.
Қазақстан Республикасы Журналистер Одағы Атырау облыстық филиалының директоры Қуандық Батыров екі мерейгерді де Қазақстан Республикасы Журналистер Одағының дипломы мен Қазақстан Республикасы Журналистер Одағы Атырау облыстық филиалының Құрмет грамотасымен марапаттап, демалыс үйлеріне тегін жолдама ұсынды.
Бұдан кейін, ұлттық тарих пен ұлттық мәдениетті насихаттауға қосқан үлесі үшін белгілі заңгер, «Каспиймұнайгаз» ғылыми-зерттеу және жобалау институты АҚ-ның департамент директоры, халықаралық «Құрмет белгісі» орденінің, Бейбітшілік әлемі «Ұлт мақтанышы» медалінің иегері Балапан Дәрежеге Халықаралық ақпараттар академиясының мүшелігіне кандидаттыққа қабылданғаны туралы куәлік табыс етілді.
Халықаралық «Құрмет белгісі» орденін әлемде иемденген 139 адам болса, солардың ішіндегі жалғыз әйел адам – атыраулық Балапан Дәреже екендігін қаламгерлер мақтанышпен атап өтті.
Ағиба ҚАТЕШОВА.
