Облыстық халық шығармашылығы орталығында “Жасай бер, жаса, Тәуелсіз ел – Қазақстан!” атты концерттік бағдарлама өтті.
Шара барысында облыстық халық шығармашылығы орталығының басшысы Алма Андарбаева халқымыздың сан ғасырлық асқақ арманы мен арпалысқа толы күресінің нәтижесінде Тәуелсіздіктің туы желбіреп, елімізді ерен жетістіктерге жеткізген, бейбіт өмірдің салтанат құруына, экономиканың еңселі дамуына жол ашқан, қазақ халқын дүние жүзіне танытуда тұңғыш Президент Нұрсұлтан Назарбаевтың еңбегі зор екенін баса айтты.
Концерттік бағдарлама «Әсем-ай» халықтық би ансамблінің орындауындағы “Шашу” қазақ биімен ашылды. Одан әрі мың бұралған бишілер сахнаның сәнін келтіріп, әншілер әсем әуендерін әуелетіп, күйшілер күмбірлеген күй төкті. Ел Тәуелсіздігінің жиырма екі жылдығына арналған мәдени сазды бағдарлама көрермен қауымға ерекше көңіл-күй сыйлады.
Алтыншаш ҚҰРМАШЕВА.
