Индер ауданында жоғалған малшы табылды

15 ақпан күні 53 жастағы Индер ауданының тұрғыны түйемен мал бағуға шығып, осы уақытқа дейін кері оралмағаны жөнінде хабарлаған болатынбыз.

Атырау облыстық Төтенше жағдайлар департаментінің баспасөз қызметінің хабарлауынша, сол күні 14 сағат 30 минутта Индер ауданы Өрлік селосынан 30 км қашықтықта орналасқан «Аманғали» қыстағынан 5 шақырым қашықтықтан жоғалған малшы табылды. Табылған азаматтың жағдайы бірқалыпты, медициналық көмекті қажет етпеді.

Іздестіру-құтқару жұмыстарына Атырау облысы Төтенше жағдайлар департаментінен 4 қызметкер мен 1 бірлік техника, сонымен қатар АПБ, жоғалған азаматтың туыстары мен жергілікті тұрғындар да қатысты.