Фариза Оңғарсынова тұрған үйден ескерткіш тақта ашылды

Жақында Алматыда қазақтың аса көрнекті ақыны, Қазақстанның халық жазушысы, Мемлекеттік сыйлықтың лауреаты, қоғам қайраткері Фариза Оңғарсынованың тұрған үйінде ескерткіш тақта ашылды.

Көзі тірісінде-ақ «Поэзия падишасы» атанған ақын қазақ поэзиясын дамытуға елеулі үлес қосты. Оның қаламынан туған махаббат, адам тағдыры туралы шығармалары қазақ әдебиетінің жауһарына айналды. Ескерткіш тақта ашылған Зенков көшесіндегі үйде ақын 1981-1996 жылдар аралығында тұрған.  Ашылу рәсіміне қатысқан зиялы қауым өкілдері ақынның табандылығын, еңбекқорлығын, отаншылдығын еске алып, оның поэзиядағы өзіндік қолтаңбасы келер ұрпаққа өшпес мұра екендігін жеткізді.

Белгілі қоғам қайраткері, Қазақстанның еңбек сіңірген қызметкері Шәмшә Беркімбаева «Фаризаның жоқтаушылары өте көп, халқы әлі іздейді. Қазақ деген халық аман тұрса, біздің ұрпақ Фаризаның артында қалдырған аманаты, үлкен мұрасы – өлеңдері арқылы ақын апасымен сырласады ғой деп ойлаймын» десе, ақын поэзиясының аудармашысы Татьяна Фроловская «Фариза мені қазақ әдебиетінің әлеміне енуіме себепші болды. Екеуміз 40 жылға таяу бірге жұмыс істедік. Ол маған Махамбеттің өлеңдерін жинақтап берді. Оны орыс тілінде сөйлеттік. Фаризадай адам енді туа ма, білмедім. Білетінім, маған қазір екеуміздің шығармашылық байланысымыз, ортақ әңгімеміз жетіспейді» деп тебіре еске алды.

                                                                                              Бақытжан ХАМИТҰЛЫ