“Елдікке еңбек еткен”  

Атыраудың ардақты перзенті, қазақтың қатепті қара нары атанған аяулы азаматтарының бірі, көрнекті Мемлекет қайраткері, белгілі мұнайшы Нұрлан Өтепұлы Балғымбаевтың  туғанына биыл — 75 жыл. 

Кеше, оның есімімен аталатын коммуникациялық орталықта өткен шара “Елдікке еңбек еткен” деп аталды.  

-Тәуелсіздік жылдарында қуатты реформаларды іске асырып, инвесторлармен табысты серіктестік құрудағы Нұрлан Өтепұлының еңбегі халыққа белгілі. Мемлекеттік басқару мен экономикадағы ірі қайраткер ретінде өзінің барлық білімі мен тәжірибесін Қазақстанның өркендеуіне арнады.

Атырау мұнай және газ университеті талантты білімгерлерге осындай өнегелі тұлғалардың атындағы стипендияны тағайындауды дәстүрге айналдырып келеді. Биыл үшінші жыл қатарынан біздің студенттеріміз Нұрлан Балғымбаев атындағы қордың қолдауымен арнайы стипендияға ие болып отыр. Бұл – стипендия иегері атанған әр студент үшін мақтаныш және үлкен жауапкершілік!-деді жиында сөз алған Атырау мұнай және газ университетінің ректоры Гүлзада Шакуликова. 

Сондай-ақ, шара барысында ҚР Парламенті Мәжілісінің депутаты Дүйсембай Тұрғанов, қазақ классикалық музыка өнерінің белгілі тұлғалары Төлеген Мұхамеджанов пен Нұржамал Үсенбаева тілектерін арнады.  

— Қандай қиын кезең болса да, Нұрекең адамгершілігінен аттамады. Оның мұнай кәсіпшілігінен бөлек Атырак футбол командасын қүруда еңбегі орасан зор болды. Өнегелі тұлғаның ғибратты ғұмырын кейінгі ұрпаққа жеткізу — мақсатымыз,-дейді халық қалаулысы. 

Айбөпе Сабырова

Фото: Ерлан Алтыбаев